३७८ कृषि प्राविधिकमध्ये १२९ जनाको पद दर्ता हुने

काठमाडौँ । कृषि तथा पशुपन्छी विकास मन्त्रालयमा धर्नामा बसेका १२९ कृषि प्राविधिकको पद दर्ता हुने भएको छ । आन्दोलनरत ३७८ जना कृषि प्राविधिक कर्मचारीमध्ये १२९ जनाको पद दर्ता गरिने मन्त्रालय स्रोतले जनाएको हो ।

यो सँगै कृषि प्राविधिक कर्मचारीको धर्ना तत्कालका लागि स्थगन भएको छ । २०७५ सालमा संघीयतामा कर्मचारी समायोजन गर्दा ३७८ जना कृषि प्राविधिक कर्मचारीको पद दर्ता हुन सकेको थिएन । सो पद दर्ता नहुँदा ती सबै कर्मचारीको वृद्धि विकास हुन नसकेकाले उनीहरू ४३ दिन मन्त्रालयको प्रवेशद्वारामा धर्ना बसेका थिए ।

प्रधानमन्त्री कृषि आधुनिकीकरण परियोजनाका योजना अधिकृत माधव पौडेलले मन्त्रीको आग्रहमा एक साताको लागि मात्रै धर्ना स्थगन गरिएको बताए । उनले २४९ कृषि प्राविधिकको पद दर्ता नभए यो क्षेत्रबाट आफूहरू पलायन हुने उल्लेख गरे ।

‘सरकारलाई कृषि प्राविधिक खाँचो छैन भने धेरै साथीहरू पलायन हुने सम्भावना छ,’ उनले भने, ‘हामी सबैको पद दर्ता हुनु पर्छ, मन्त्रीज्यूको आग्रहमा मात्रै एक साताका लागि धर्ना स्थगन गरेका छौँ ।’२०७५ सालमा समायोजन हुँदा पद दर्ता नहुँदा ६ वर्षदेखि पदपूर्ति प्रक्रिया रोकिएको छ ।