नवराजपुरका तत्कालीन प्रमुख प्रशासकीय अधिकृत कुसियैतसहित ८ जनाविरुद्ध भ्रष्टाचार मुद्दा

काठमाडौं। अख्तियार दुरुपयोग अनुसन्धान आयोगले सिरहाको नवराजपुर गाउँपालिकाका तत्कालीन प्रमुख प्रशासकीय अधिकृत अमरेन्द्र कुसियैतसहित ८ जनाविरुद्ध भ्रष्टाचार मुद्दा दायर गरेको छ ।उनीहरूविरुद्ध शुक्रबार विशेष अदालत काठमाडौंमा मुद्दा दायर गरिएको आयोगका ​प्रवक्ता नरहरि घिमिरेले जानकारी दिए ।​

प्रवक्ता घिमिरेका अनुसार कुसियैतसहित गाउँपालिकाका इन्जिनियर कृष्णा साह, सव-इन्जिनियर सन्तोषकुमार यादव र लेखापाल सोमप्रसाद आचार्य, उपभोक्ता समितिका अध्यक्ष जिवछकुमार यादव, कोषाध्यक्ष पूनमकुमारी देवी र सचिव रामउदगार मण्डल भन्ने रामउदगार खतवे मण्डल र वडा नम्बर २ का  तत्कालीन वडा अध्यक्ष खुसिलाल साहविरुद्ध मुद्दा दायर गरिएको हो ।

आर्थिक वर्ष २०७७/०७८ मा विनियोजित बजेटबाट वडा नम्बर २ स्थित मझौरा हुँदै बरगाछीदेखि पटनासम्म माटो र ग्राभेल निर्माण कार्यमा अनियमितता भएको भन्दै मुद्दा दायर गरिएको हो ।

माटो र ग्राभेल योजना सम्झौता र नापी किताबमा उल्लेख भएबमोजिम फिल्डमा काम नगरी लागत अनुमानभन्दा फरक र कम परिमाणको काम गराई बढी भुक्तानी दिएको पाइएको हो ।

झुट्टा बिल भरपाई, नापी किताब, कार्य सम्पन्न प्रतिवेदन तयार गरी १२ लाख ७ हजार २६० रुपैयाँ बढी भुक्तानी दिएको भन्दै मुद्दा दायर गरिएको अख्तियारका प्रवक्ता घिमिरेले जनाएका छन् ।