गणतन्त्रपछि समग्र क्षेत्रको विकास तीव्र गतिमा भइरहेको छ : उपमहासचिव पुन

काठमाडौं । माओवादी केन्द्रका उपमहासचिव वर्षमान पुनले गणतन्त्रको पछिल्लो पन्ध्र वर्षको समयावधिमा देशमा स्वास्थ्य, शिक्षा, खेलकुद, भौतिक पूर्वाधार निर्माण लगायत सबै क्षेत्रमा तीव्र विकास भएको बताएका छन् । 

शनिबार काठमाडौँमा प्रथम शहीद स्मृति बागमती प्रदेश रनिङ शिल्ड प्रतियोगिताको खेलाडी सम्मान तथा शहीद बेपत्ता परिवार सम्मान कार्यक्रममा उपमहासचिव पुनले देशमा गणतन्त्र आएपछि तुलनात्मक रूपमा शिक्षा, स्वास्थ्य, खेलकुद, पूर्वाधारलगायतका क्षेत्रमा तीव्र विकास भएको चर्चा गरे । 

‘हामीले ३० वर्षको पञ्चायत हेर्यौं त्यसपछिको राजतन्त्रात्मक संसदीय व्यवस्था पनि हेर्यौं । त्यसयताको व्यवस्थामा भएका कामलाई तुलनात्मक रूपले हेर्यौं भने शिक्षा,स्वास्थ्य,भौतिक पूर्वाधार,खेलकुद सबै क्षेत्रमा तीव्र विकास भएको छ । त्यो नेपालीको आकांक्षा र आवश्यकता अनुसार अझै भएको छैन’ पुनले भने । 

उपमहासचिव पुनले खेलकुदको विकासमा आफ्नो सरकारले प्राथमिकता दिएकै कारण क्रिकेट, भलिबल र महिला फुटबलमा राम्रो नतिजा आएको दाबी गरे ।