आर्थिक मुद्दामा सबै राजनीति दलहरूको एउटै धारणा हुनुपर्छ : अध्यक्ष ढकाल

काठमाडौँ । उद्योग वाणिज्य महासंघका अध्यक्ष चन्द्र ढकालले आर्थिक मुद्दामा सबै राजनीति दलहरूको एउटै धारणा हुनुपर्ने बताएका छन् । राज्यव्यवस्था तथा सुशासन समितिको बैठकलाई सम्बोधन गर्दै अध्यक्ष ढकालले राजनीतिक परिवर्तनपछि आर्थिक क्षेत्रलाई प्राथमिकता दिने अपेक्षा लिए पनि त्यस्तो हुन नसकेको बताए ।

कोभिडपछि र रूस–युक्रेन युद्धले विश्वको अर्थतन्त्रमा प्रभाव परेको भन्दै उनले अहिले नयाँ व्यवसाय सुरु गर्न कन्फिडेन्स व्यवसायीमा नभएको बताए । स्वेदेशी लगानीकर्ता नै लगानी गर्न हतोत्साहित भएको बेला कसरी विदेशी लगानी भित्राउन सकिन्छ ? भन्दै उनले सरकारसँग प्रश्न गरे ।

'निजी क्षेत्रलाई हेर्ने नियमन गर्ने धेरै निकायहरू छन् । त्यस कारण अख्तियारले पनि निजी क्षेत्रलाई हेर्ने कानुनी व्यवस्था गर्न हुँदैन भनेर हामीले भन्दै आएका छौँ । अहिले भएकै निकायलाई बलियो बनाएर नियमन गर्नुपर्छ । अन्यथा लगानी ब्रेक लाग्न सक्छ,' उनले भने ।