जीतपुरसिमरा महोत्सवको तयारी तीव्र, स्थानीय उत्पादनको प्रवर्द्धनमा जोड

बारा । जीतपुरसिमरा नगर उद्योग वाणिज्य संघको आयोजनामा फागुन तेस्रो सातादेखि प्रथम जीतपुरसिमरा महोत्सव हुने भएको छ  । जीतपुरसिमरा ३ स्थित मालपोत कार्यालय नजिकको खुला चौरमा फागुन १८ गतेदेखि २९ गतेसम्म महोत्सव आयोजना गर्न लागिएको हो ।

‘कृषि, पर्यटन, खेल, उद्योग र व्यापार, जीतपुरसिमरा, बारा मधेस समृद्धिको मुख्य आधार’ को नारासहित केही दिन अघिदेखि तयारी थालेको संघले सोमबार पत्रकार सम्मेलनको आयोजना गर्दै महोत्सवको उद्देश्यका विषयमा जानकारी गराएको छ ।

आफ्नो नेतृत्वमा पहिलो पटक महोत्सवको आयोजना गर्न लागेको संघले १२ दिने महोत्सवले सुस्त रहेको व्यावसायिक क्षेत्रलाई चलायमान बनाउने अपेक्षा लिएको छ ।

संघका अध्यक्ष मोहन शर्मा लामिछानेले आर्थिक मन्दीका कारण ठप्प व्यावसायिक क्षेत्रलाई एकै थलोमा उभ्याउने र चलायमान बनाउन प्रवर्द्धन तथा प्रोत्साहन गर्ने उद्देश्य महोत्सवले राखेको बताए । महोत्सवमा समाजको हरेक क्षेत्रलाई समेट्न लागिएको उनले बताए  ।

‘हाम्रो लक्ष्य सबैलाई एकै थलोमा उभ्याउने, व्यावसायिक संस्था वा व्यक्तिले उत्पादन, कला, सेवाको प्रवर्द्धन गर्न वातावरण बनाउने हो,’ लामिछानेले भने, ‘पक्कै पनि यो महोत्सव उहाँहरूका लागि एउटा प्लेटफर्म बन्नेछ र मन्द अवस्थामा रहेको व्यावसायिक क्षेत्रलाई चलायमान बनाउन कोशेढुंगा साबित हुनेछ ।’

लामिछानेले महोत्सवमा आर्थिक, शैक्षिक, पर्यटन, कृषिलगायत विभिन्न क्षेत्रको प्रदर्शनी रहने जनाएका छन् । महोत्सव अवलोकन गर्न आउने नागरिकले ती व्यावसायिक क्षेत्रका बारेमा बुझ्न पाउने र आवश्यकता अनुसारका सामाग्री खरिद तथा सेवाबारे परामर्श लिन सक्ने लामिछानेको भनाइ छ ।

महोत्सवलाई करिब एक लाख भन्दा बढीले अवलोकन गर्ने लक्ष्य रहेको नगर उद्योग वाणिज्य संघले राखेको छ । महोत्सवमा प्रवेशका लागि विद्यार्थीले २५ र अन्यले ५० रुपैयाँ शुल्क तिर्नुपर्नेछ भने अपाङ्गता र ज्येष्ठ नागरिकले निःशुल्क अवलोकन गर्न सक्नेछन् ।

महोत्सवलाई सफल बनाउनका लागि स्थानीय, प्रदेश र सङ्घीय सरकार, निजी क्षेत्रबाट सहयोगको अपेक्षा संघले राखेको लामिछानेले बताएका छन् । महोत्सव आयोजनाका लागि स्थानीय सरकार, प्रशासन र सम्बन्धित क्षेत्रबाट स्वीकृति प्राप्त भइसकेको लामिछानेले जानकारी दिए ।

महोत्सवमा स्थानीय तथा राष्ट्रिय कलाकारको उपस्थितिमा दैनिक रूपमा सांस्कृतिक कार्यक्रम, कुस्ती प्रतियोगिता, बाल उद्यानलगायत विभिन्न मनोरञ्जनका क्षेत्रलाई समेटिने संघका महासचिव प्रकाश गिरीले बताए । उनले महोत्सवका तयारीका लागि २० वटा उपसमिति गठन गरी तयारी भइरहेको समेत जानकारी दिए ।

आज आयोजना गरिएको पत्रकार सम्मेलनमा संघका निवर्तमान अध्यक्ष सञ्जय साह, संस्थापक अध्यक्ष घनश्याम गिरी, नेपाल पत्रकार महासंघ बाराका अध्यक्ष रेशम तिवारी, प्रचार समितिका संयोजक राजुराज गिरीलगायतले मन्तव्य राखेका थिए । पत्रकार सम्मेलनमा उपाध्यक्ष गजेन्द्र गुप्ता, सचिव विष्णुप्रसाद अधिकारीलगायतको उपस्थिति रहेको थियो ।