प्रहरी हुँ भन्दै ठगी गरेको आरोपमा महिला पक्राउ

‍‍‍‍‍‍‍‍‍‍‍‍‍काठमाडौं । प्रहरी हुँ भन्दै ठगी गरेको अभियोगमा एक महिला पक्राउ परेकी छिन्। पक्राउ पर्नेमा बैतडी पुर्चौडी नगरपालिका-६ घर भई चन्द्रागिरि नगरपालिका-१४ नैकाप डेरा गरी बस्ने २४ वर्षीया अमिला कुमारी साउँदलाई छिन्। उनलाई प्रहरीले सोमबार दिउँसो पक्राउ गरेको हो।

साउदले आफूलाई नेपाल प्रहरीको प्रहरी नायब निरीक्षक हुँ भन्दै दैलेख नारायण नगरपालिका-११ बस्ने २६ वर्षीया महिलालाई राष्ट्रिय अनुसन्धान विभागको सिपाही पदमा जागिर लगाइदिने प्रलोभनमा पारेर नगद १ लाख ५० हजार रुपैयाँ ठगी गरेको जिल्ला प्रहरी परिसर काठमाडौंले जनाएको छ।

प्रहरी वृत्त थानकोटबाट खटिएको प्रहरीले उनलाई पक्राउ गरेको थियो। साथै उनको साथबाट नेपाल प्रहरीको पोशाक १ जोर, प्रहरी सहायक निरीक्षकको दर्ज्यानी चिन्ह १ थान, नेमप्लेट १ थान, बुट १ जोर, बेल्ट १ थान र मोबाइल १ थान समेत बरामद भएको छ।  

यस सम्बन्धमा प्रहरीले आवश्यक अनुसन्धान गरिरहेको छ।