बाबुराम भट्टराईको एक्लै हिड्ने बानी छ : उपेन्द्र यादव

काठमाडौं ।  जनता समाजवादी पार्टीका अध्यक्ष उपेन्द्र यादवले समाजवादी मोर्चामा डा. बाबुराम भट्टराईलाई कहिले सहभागी नभएको बताएका छन्। आज पत्रकार सम्मेलनमा भट्टराईको एक्लै हिँड्ने बानी भएकाले ठिकै भएको जस्तो लागेको बताएका हुन्। 

‘खै, बाबुराम भट्टराईलाई समातेको पनि होइन छोडेको पनि होइन हामीले। ’उनले भने,  ‘बाबुराम जी, कहिले पनि मोर्चामा सहभागी भएको, आएको, संलग्नता भएको देखिएन। मोर्चा बनाउन एक वर्ष अगाडि देखि तयारी थियो । छुट्नुभएको भए उहाँलाई थाहा होला। ’ उनले मोर्चामा लिएको अवधारणालाई समर्थन गर्नेलाई बाटो राखिएको बताए।

यादवले समाजवादी मोर्चा एउटै पार्टी नबन्ने बताए। उनले मोर्चाभित्रका पार्टीबीच एकता हुन सक्छ तर समाजवादी मोर्चा नै एउटा पार्टी हुने आँकलन गलत भएको स्पष्ट पारे।

यादवले गठबन्धनमा आवद्ध दलसँग छलफल नगरी सरकारले बजेट ल्याएको बताए। उनले मधेशलगायत धेरै क्षेत्रमा बजेटले अपेक्षा गरेकाले सच्याउनुपर्ने धारणा राखे। उनले यथास्थितिमा बजेट पास गर्न नहुने बताए।