चितवन । सिहदरबार देशकै सबैभन्दा बढी सुरक्षित स्थान मानिन्छ । तर, सिंहदरबार भित्रबाटै गाडीको टायर चोरी भएको छ ।
स्थानीय विकास मन्त्रालयको सस्पेन्सन ब्रिज शाखाको बा१झ २९२७ नम्बरको टोयटा हाइलक्स गाडीका चारवटै टायर चोरी भएको हो ।
गाडीका चालक श्रीकृष्ण श्रेष्ठले शुक्रबार शाखाका प्रमुख गुरुप्रसाद शर्मालाई घर पुर्याएर सिंहदरबारभित्रै पार्किङ गरेका थिए ।
तर, आइतबार आउँदा गाडीका चार वटै टायर चोरी भएको पाइएपछि श्रेष्ठले प्रहरीलाई खबर गरेका थिए ।
सेना र प्रहरीको २४ घण्टे सुरक्षा रहेको ठाउँबाटै गाडीका टायर चोरी भएपछि सबैले अचम्म मानेका छन् । गाडी पार्किङ्ग गरेको स्थान र सेना र प्रहरीको ड्यूटी स्थल करिब २० मिटरको दुरीमा छ ।
अरुलाई गाडीका पार्टपूर्जा सम्बन्धी जानकारी नहुँने भएकोले चोरी कार्य ड्राइभरहरुबाटै हुनसक्ने आशंका प्रहरीले गरेको छ ।
चोरी भएको एउटा टायरको मूल्य ५० देखि ६० हजारसम्म पर्छ ।
प्रतिक्रिया दिनुहोस