म्याद थपका लागि सन्दीपलाई आज अदालत लैजाने

काठमाडौँ । नेपाली राष्ट्रिय क्रिकेट टिमका क्रिकेटर सन्दीप लामिछानेलाई म्याद थपका लागि बुधबार अदालत लगिँदैछ।

नाबालिगमाथि जबरजस्ती करणी गरेको जाहेरीका आधारमा असोज २० गते पक्राउ परेका क्रिकेटर लामिछानेलाई तेस्रोपटक म्याद थपका लागि आज काठमाडौँ जिल्ला अदालतमा उपस्थित गराइने भएको हो।

गत भदौ ५ गते १७ वर्षीया नाबालिगमाथि जबरजस्ती करणी गरेको भन्दै भदौ २१ गते प्रहरी वृत्त गौशालामा सन्दीपविरुद्ध जाहेरी परेको थियो। जाहेरी परेसँगै नेपाली क्रिकेट टोलीका पूर्व कप्तानसमेत रहेका लामिछाने निलम्बनमा परेका थिए।

असोज २४ गते अदालतमा सन्दीपले आफू निर्दोष रहेको प्रमाण पेस गरेका थिए।