सञ्जय दत्तसँग स्क्रिन सेयर गर्दै सेहनाज

काठमाडाैँ । शेहनाज गिलका प्रशंसक उनको बलिउड डेब्युको प्रतिक्षामा छन् । उनी सलमान खानको चलचित्र ‘कभी ईद कभी दिवाली’बाट बलिउडमा डेब्यु गर्दैछिन् । यसअर्थमा शेहनाजको बलिउड करिअरको सुरुआत निकै राम्रो भएको छ । अघिल्लो ग्राफ हेर्ने हो भने एकाधबाहेक सलमानको चलचित्रबाट डेब्यु गर्ने अभिनेत्रीहरूले करिअरमा पछाडि फर्केर हेर्नु परेको छैन ।
 
डेब्यु चलचित्रको चर्चा सेलाउन नपाउँदै शेहनाजको करिअरलाई लिएर दोस्रो ठूलो खबर बाहिरिएको छ । नवभारत टाइम्सका अनुसार उनलाई आइतबार सञ्जय दत्तसँग महबुब स्टुडियो बाहिर देखियो । उनलाई सञ्जय दत्तसँग मेहबुब स्टुडियो बाहिर देखिएसँगै दोस्रो चलचित्रमा सञ्जय दत्तसँग स्क्रिन सेयर गर्न लागेकी हुन् कि भन्ने आशंका गरिएको छ ।

यो आशंकालाई शेहनाज आफैंले पुष्टि पनि गरेको देखिन्छ । स्टुडियो बाहिर रहेका फोटोपत्रकारहरुसँग खुसी साट्दै उनले सञ्जय दत्तसँग अमेरिका जान लागेको बताइन् । थुप्रै पञ्जाबी चलचित्र र म्युजिक भिडियोमा अभिनय गरिसकेकी शेहनाज पछिल्लो समयमा निकै चर्चामा छिन् ।