‘परदेशी -२’ काे टिजर सार्वजनिक, असोजमा प्रदर्शन हुने

काठमाडौं । फिल्म ‘परदेशी २’ को टिजर सार्वजनिक भएको छ । फिल्म ‘परदेशी’को दोस्रो श्रृंखला ‘परदेशी २’को प्रदर्शन मिति घोषणासँगै टिजर सार्वजनिक गरिएको छ ।

फिल्म ‘परदेशी २’ लाई आगामी असोज १४ गतेदेखि सिनेमा हलहरूमा प्रदर्शन गरिने छ । चर्चित लोकगायक प्रकाश सपुतले अभिनेताको रूपमा यस फिल्मबाट डेब्यू गर्दैछन् ।

अध्ययनका लागि अमेरिका गएका एक युवाको संघर्ष र प्रेम जीवनलाई फिल्ममा देखाउन खोजिएको फिल्म नारायण रायमाझीले निर्देशन गरेका छन् । फिल्मको टिजरमा प्रेम, वियोग, संवेदना र द्वन्द्वकाे मिश्रण भेटिन्छ । नेपाली विद्यार्थीमा रहेको विदेश मोहलाई फिल्मको मुख्य कथावस्तु बनाइएको छ ।

फिल्ममा प्रकाश सपुत, केकी अधिकारी, वर्षा सिवाकोटी, प्रशान्त तामाङ, दीलिप रायमाझी, नीर शाह, सुशील पोखरेल, सविन बास्तोला र रमा थपलियाको अभिनय रहेको छ ।

फिल्मको कथा रमेश बिजीले लेखेका हुन् भने बि.बि.अनुरागीको संगीत दिएका छन् । फिल्ममा रामजी लामिछाने र गोविन्द राईको कोरियोग्राफी, अष्ट महर्जनको द्वन्द्व, दीर्घ खड्काको सम्पादन र मानकृष्ण महर्जनले छायांकन गरेका छन् ।