संवादसहित फिल्म ‘मानिस ठूलो दिलले हुन्छ’ बन्ने

काठमाडौं । नेपालमा पहिलो पटक संवादसहित गीति फिल्म निर्माण हुने भएको छ । देवेन्द्र पाण्डेको निर्देशनमा बन्न लागेको फिल्म ‘मानिस ठूलो दिलले हुन्छ’ को मंगलबार एक कार्यक्रमका बीच निर्माण घोषणा गर्नुका साथै शुभ मुहूर्त पनि गरियो । मुहूर्त सट कलाकारहरू अभिनास न्यौपाने र श्रेया कार्कीले दिएका थिए । फिल्ममा उनीहरु प्रेम जोडीको रुपमा प्रस्तुत हुनेछन् ।

सौरपानी मिडिया प्रा.लि. को ब्यानरमा निर्माण हुने फिल्मको आजबाट छायांकन सुरु भएको छ । यसमा मोहन निरौला, उत्तम केसी, सरु सुनवार, शुभम् आचार्य र सविना न्यौपानेको पनि अभिनय रहनेछ । यसलाई मणि नेपाली पनेरुले निर्माण गर्नेछन् । उनले लेखेको ६ वटा लोकगीतमा फिल्म निर्माण हुन लागेको हो । यसमा केही प्रतिशत संवाद पनि हुनेछ ।

यसअघि दुई फिल्मको निर्देशक गरिसकेका देवेन्द्र पाण्डेले आफूले यसअघि गरेका फिल्म भन्दा ‘मानिस ठूलो दिलले हुन्छ’ भिन्न रहने दावी गरे । सामाजिक विषयवस्तुमा आधारित भएर फिल्म बन्ने उनको भनाई छ । सम्भवतः संवादसहित यो लम्बाइमा यसअघि गीति फिल्म निर्माण भएका छैनन् । करिब १५ दिन छायांकन हुने फिल्मलाई उत्सव दाहालले खिच्नेछन् भने सम्पादन विकास दाहालले गर्नेछन् ।