नयाँ फिल्म 'मायाको माया'मा राजेश हमाल अनुबन्धित

 काठमाडौं । लामो समयदेखि फिल्ममा नदेखिएका अभिनेता राजेश हमाल नयाँ फिल्म 'मायाको माया'मा अनुबन्धित भएका छन्। रोहितकरण वैद्यको निर्देशनमा बन्ने फिल्ममा आना शर्मा र अनुपविक्रम शाहीसँगै राजेश अनुबन्धित भएका हुन्। 

६ वर्ष फिल्मको पर्दाबाट टाढा रहेका राजेश पुनरागमनको तयारीमा छन्। केही दिनअघि शुभमुहुर्त भएको मायाको माया चुनावपछि छायांकनका जाने तयारीमा छ। लामो विश्रामपछि साइन गरेको राजेशको यो दोस्रो फिल्म हो। यसअघि उनी 'सत्यम'मा अनुबन्धित भएका थिए। जुन फिल्म अहिले निर्माणको क्रममै छ। 

नेपाली फिल्म उद्योगमा महानायकको उपाधि पाएका राजेश साढे ३ दशकदेखि नेपाली फिल्म उद्योगमा सक्रिय छन्। पछिल्लो समयका कुनै फिल्मले राम्रो प्रदर्शन गर्न नसकेपछि केही वर्ष विश्राम लिएका राजेश फेरि फर्कने तयारीमा लागेका हुन्। 

फिल्म नखेलेका यी वर्षमा राजेश टेलिभिजन कार्यक्रम तथा म्युजिक भिडियोमा सक्रिय थिए।