साउथका अभिनेता बिजय बाबुमाथि लाग्यो यौन शोषणको आरोप

मलयालम अभिनेता तथा निर्माता विजय बाबुविरुद्ध यौनहिंसाको मुद्दा दर्ता भएको छ । भारतीय मिडियामा प्रकाशित समाचारका अनुसार केरल प्रहरीले एक महिलाको उजुरीको आधारमा विजय बाबुमाथि यौन उत्पीडनको मुद्दा दर्ता गरेको । प्रहरीले २२ अप्रिलमा यसबारे उजुरी प्राप्त गरेको र त्यसपछि अभिनेताविरुद्ध उजुरी दर्ता गरेको जानकारी दिएको छ ।प्रहरीले दिएको जानकारी अनुसार अभिनेता विजय बाबुले कोच्चिमा एउटा फ्ल्याटमा उजुरीकर्तामाथि यौन शोषण गरेका थिए ।

कोझिकोड जिल्लामा बस्ने यी महिलाले आफूमाथि एकपटक मात्रै नभई बारम्बार यौन उत्पीडन भएको आरोप लगाइन् । विजय बाबुले उनलाई फिल्ममा अभिनयको मौका दिने बचन दिएको बताइएको छ । मुद्दा दर्ता भएको पाँच दिनभन्दा बढी समय भइसकेको छ तर प्रहरीले अहिलेसम्म अभिनेतालाई सोधपुछ गरेको छैन ।

थुप्रै हिट फिल्ममा काम गर्ने विजय बाबु मलयालम फिल्म इन्डष्ट्रिका एउटा चर्चित नाम हुन् । उनको फ्राइडे फिल्म हाउस नामको प्रोडक्सन हाउस पनि छ । उनले थुप्रै पुरस्कार पनि जितेका छन् । उनीमाथि यस्तो आरोप लागेपछि धेरैजसो चकित भएका छन् ।