जग्गा प्राप्तिसँगै खुल्यो नगर अस्पतालको बाटो

काठमाडौं ।जैमिनी नगरपालिकाले १५ शय्याको नगर अस्पताल बनाउने भएको छ । जैमिनी नगरपालिका–१ को कुश्मीसेरामा उक्त अस्पताल बन्ने भएको हो । एक पालिका एक अस्पताल बनाउने सरकारी निर्णय र पालिकाको आवश्यकतासमेतले अस्पताल निर्माण अभियान थालिएको नगरप्रमुख इनद्रराज पौडेलले बताउनुभयो । हाल कुश्मीसेरामा प्राथमिक स्वास्थ्य केन्द्र छ । उक्त केन्द्रमा विशेषज्ञ डाक्टरसहितको स्वास्थ्यकर्मीको व्यवस्था गर्ने, नगर अस्पतालमा पनि डाक्टरको व्यवस्था गर्ने पौडेलले सुनाउनुभयो ।

प्रमुख प्रशासकीय अधिकृत ज्ञानराज कोइरालाका अनुसार नागरिकलाई स्वास्थ्य सेवाको पहुँच बढाउन नगर अस्पतालको अवधारणा आएको बताउनुभयो । नगरपालिकाको स्वास्थ्य नीति अनुसार १५ शय्याको अस्पताल बनाउन छ रोपनी जग्गासमेत व्यवस्थापन भइसकेको कोइरालाले जानकारी दिनुभयो । वडा नं १ को टारमा रु ६० लाख लगानी गरेर नगरपालिकाले जग्गाको व्यवस्थापन गरिसकेको छ । जैमिनीमा नगर अस्पताल नहुँदा स्थानीयले सामान्य बिरामी भए पनि सदरमुकाम र पोखरा धाउनुपर्ने बाध्यता छ ।