प्रहरीले एसिड खन्याएपछि घाइते भएकी कल्पनाको उपचार हुँदै

चितवन । रत्ननगरमा कार्यरत ट्राफिक प्रहरीका नायब निरीक्षक रामचन्द्र खनियाले एसिड छर्किएपछि घाइते भएकी कल्पना श्रेष्ठको भरतपुर अस्पतालमा उपचार भइरहेको छ ।
प्रहरी नायब निरीक्षक खनियाले हिजो आइतबार दिउँसो तीन बजेको समयमा भरतपुर महानगरपालिका वडा नम्बर ४, त्रिचोकमा कल्पनामाथि एसिड छर्किएका थिए । गोर्खा घर भई त्रिचोकमा डेरा गरी बस्ने २८ वर्षीया श्रेष्ठलाई खनियाले एसिड छर्किएको प्रहरीले जनाएको छ ।
जिल्ला प्रहरी कार्यालय चितवनका प्रवक्ता प्रहरी नायब उपरीक्षक प्रभुप्रसाद ढकालका अनुसार श्रेष्ठको अनुहार र खुट्टामा एसिड परेको छ । घाइते श्रेष्ठको अवस्था मध्यम रहेको प्रहरी प्रवक्ता ढकालले बताउनु भयो । घटना भए लगत्तै खनियालाई पक्राउ गरी प्रहरीको हिरासतमा राखिएको छ । एसिड प्रहारबाट घाइते श्रेष्ठका श्रीमान नेपाली सेनामा कार्यरत रहेको प्रारम्भिक अनुसन्धानबाट खुलेको भएपनि एसिड छर्कनुको कारण भने अहिलेसम्म खुल्न नसकेको ढकालले बताउनु भयो । घटनाबारे प्रहरीले अनुसन्धान गरिरहेको छ ।