कैलाश कप फुटबलको उपाधी रामपुर फुटबल क्लबलाई

भरतपुर : रामपुर फुटबल क्लबले कैलाश कप फुटबल प्रतियोगिताको उपाधी उचालेको छ । कैलाश टोलको खेल मैदानमा आज (सोमबार) भएको फाईनल खेलमा भरतपुर फुटबल क्लबलाई १–० गोल अन्तरले पछि पार्दै उपाधी उचालेको हो । उपाधी सगै रामपुर फुटबल क्लबले नगद ५० हजार प्राप्त गरेको छ ।
रामपुर क्लबले खेलको १५ औ मिनेटमा रामपुरका विमल तमाङले गरेको एक मात्र गोल नै निर्णयक बन्न पुग्यो । खेलको सुरु देखि अन्त्यसम्म नै भरतपुर फुटवल क्लबलाई रामपुरले दवाबमा राखेको थियो । 

भरतपुर फुटबल क्लबले गोल फर्काउन मिहिनेत गरेको भए पनि गोल फर्काउन सकेन । प्रतियोगिताको उपविजेता भरतपुर फुटबल क्लबले २५ हजार पुरस्कार प्राप्त गरेको छ । प्रतियोगिता चितवन र नवलपरासीका गरि १६ वटा टिमको सहभागिता रहेको थियो ।