गरिव देशमा खोपको चरम अभावले खोप अभियान नै रोकियो : डब्ल्युएचओ

काठमाडौँ । गरिब देशहरुले कोरोना भाइरसविरुद्धको खोप अभाव हुँदा खोप अभियान नै रोकिएको विश्व स्वास्थ्य संगठन (डब्ल्युएचओ) ले जनाएको छ ।

खोपको समान पहुँच सुनिश्चित गर्नका लागि सुरु गरिएको कोभ्याक्स अभियान अन्तर्गत खोप पाइरहेका धेरै गरिब देशहरुमा खोप सकिएपछि अभियान नै रोकिएको डब्ल्युएचओले जनाएको छ ।

डब्ल्युएचओका वरिष्ठ सल्लाहकार डाक्टर ब्रुस एलवर्डले कोभ्याक्स कार्यक्रम मार्फत ९ करोड खोप १ सय ३१ वटा देशमा वितरण भए पनि पर्याप्त हुन नसकेको बताएका छन् । युगान्डा, जिम्बाब्वे, बङ्गलादेश र ट्रिनिडाड एण्ड टोबागोमा खोप अभावले अभियान रोकिएको छ ।

सोमबार दक्षिण अफ्रिकाका राष्ट्रपति सिरिल रामाफोसाले धनी देशहरुलाई खोपमा गरिरहेको अवरोध अन्त्य गर्न अपील गरेका थिए । अफ्रिका महादेशमा अहिलेसम्म कोरोना भाइरसविरुद्धको खोपको मात्रै चार करोड मात्रा लगाइएको छ । यो कुल जनसंख्याको दुई प्रतिशत भन्दा कम भएको बीबीसीले उल्लेख गरेको छ ।

धनी देशहरुले गरिब देशका लागि खोप खरिद गरेर समान रुपमा वितरण गर्ने उद्देश्यसहित गएको वर्ष कोभ्याक्स अभियान घोषणा भएको थियो ।

गरिब देशका कम्तीमा २० प्रतिशत जनताका लागि खोप उपलब्ध गराउने कोभ्याक्स अभियानको लक्ष्य छ । तर, उत्पादनमा भएको ढिलाइले आपूर्तिमा गम्भीर असर परेको छ ।