रौतहटमा गोली हानी युवतीको हत्या, पूर्व प्रेमीमाथि आशंका

रौतहट । रौतहटको माधवनारायण नगरपालिका–७ लौकाहामा बुधबार राति एक युवतीको गोली हानी हत्या भएको छ ।

गएराति राति ११ बजे घरमा सुतिरहेको अवस्थामा १८ वर्षीया अमृता कुमारीको गोली हानी हत्या भएको प्रहरीले जनाएको छ । गोली लागेर उनको घटनास्थलमै मृत्यु भएको हो । 
 ।

मृतककी आमा सिता देवी साह राति घरको ढोका खोली शौचालयतर्फ गएको मौका छोप्दै अज्ञात व्यक्ति घरमा प्रवेश गरेर अमृताको टाउकोमा गोली प्रहार गरेको बताइएको छ । गोलीको आवाज सुनेर आफू शौचालयबाट निस्केर कोठामा जाँदा छोरी छटपटाएको देखेको र केहीबेरमै उनको मृत्यु भएको आमा सिता देवीले बताइन् ।

घटनामा संलग्नको पहिचान भइसकेको र अनुसन्धान कार्य अगाडि बढेको जिल्ला प्रहरी कार्यालय रौतहटका प्रवक्ता डिएसपी भरत श्रेष्ठले बताए । उनको प्रेम प्रसंगका कारण हत्या भएको हुनसक्ने प्रहरीले प्रारम्भिक अनुमान गरेको छ । 

अमृताको २०७६ फागुन २५ गते सर्लाही विष्णुपुर गाउँपालिकाको मधुवनगोठका सोहन भन्ने रुपेश साहसँग मागी बिहे भएको थियो । तर साउन महिनामा सम्बन्ध विच्छेद भएपछि उनी माइतीघरमा बस्दै आएकी थिइन् ।

गत वैशाख महिनामा उनका श्रीमान रुपेशमाथि धारिलो चक्कु प्रहार भएको थियो । चक्कु प्रहारबाट गम्भीर घाइते भएका रुपेश तीन महिनाको उपचारपछि निको भएका थिए ।

त्यसपछि २०७७ साउन २५ गते रुपेश र अमृताबीच जिल्ला अदालत मलंगवाबाट सम्बन्ध विच्छेद भएको थियो ।

विवाह भएको तेस्रो दिनमा नै रुपेश माथि आक्रमण भएको थियो । युवतीका पूर्व प्रेमीले आक्रमण गरेको खुलेको प्रहरीले जनाएको छ ।

त्यसपछि पूर्व प्रेमी भनिएका युवा विरुद्ध सर्लाहीमा ज्यान मार्ने उद्योगमा मुद्दा दर्ता भएको थियो । केही समय पहिले जेलबाट छुटेका ती युवाले नै युवतीको हत्या गरेको हुन सक्ने आशंका प्रहरीले गरेको छ ।