‘भीआईपी’ हरु पनि कोरोनाबाट प्रताडित

काठमाडौं ।  नेपालमा कोरोना संक्रमतिको संख्या २७,२४१ पुगेको छ । त्यसमध्ये १७,४९५ निको भईसकेका छन् । मृत्युको संख्या १०९ छ ।  नेपालगञ्ज उपमहानगरपालिका ५ निवासी ६२ वर्षिय एक पुरुषको नेपालगञ्ज मेडिकल कलेजमा उपचारका क्रममा निधन भएसँगै मृत्यु हुनेको संख्या १०९ पुगेको हो । यो पछिल्लो तथ्यांक हो ।

चैत ११ देखि साउन ७ सम्म सरकारले कोरोना संक्रमण रोकथाम र नियन्त्रणका लागि भन्दै देशभर लकडाउन (बन्दाबन्दी)को घोषणा गरेको थियो । त्यसपछि लकडाउन खोलेको सरकारको प्रतिक्रिया थियो । बन्दाबन्दीका बेलामा सरकारले लकडाउन लगाउने र चुपचाप आफ्नो सत्ता टिकाउने अनेक फन्डामा मात्र रमाईरहेको आरोप लाग्यो । हुन पनि उक्त बन्दाबन्दीको अवधिमा सरकारले गर्नुपर्ने तयारीमा पूर्णत चुक्यो ।

जसको परिणाम बन्दाबन्दी खोल्न नपाउँदै नेपालमा संक्रमितको संख्या ह्वात्तै बढेबाट नै पुष्टि हुन्छ । समुदायस्तरमा संक्रमण फैलिइसकेको कुनै पनि संक्रमतिको  कन्ट्याक ट्रेसिङ  मै नपरेका ब्यक्तिसम्म संक्रमति भएबाट पुष्टि हुन्छ । तर पनि सरकारले लकडाउनको केन्द्रीय रुपमा गरेको छैन् । अहिले स्थानिय तहलाई नै आफ्नो अनुकुलतामा बन्दाबन्दीको विषयमा निर्णय लिन दिने गरी सरकारले छोडेको छ ।

त्यही आधारमा कतिपय महानगरपालिका, उपमहानगरपालिका, नगरपालिका र गाउँपालिकाले बन्दाबन्दीको निर्णय लिएका छन् । केहीले गर्ने तयारी गरिरहेका छन् । जनस्वास्थ्य विज्ञ डा. दिनेश न्यौपाने काठमाडौं भित्रै थुप्रै संक्रमितहरुलाई कोरोनाको संक्रमण कहाँबाट फैलियो भनेर पत्ता लगाउन नसकिएको बताउँछन् । प्रयोगशाला परीक्षण अहिले मुख्य गरेर क्वारेन्टिनमा भएकाहरुलाई मात्र लक्षित रहेकोले मुख्य शहरहरुमा कोरोनाको मात्रा कुन रुपमा फैलिएको छ भन्ने पत्ता लगाउन समस्या भईरहेको उनको भनाई छ ।

उनले भने,–‘क्वारेन्टिनमा बस्नेहरु मूलतःभारतबाट फर्किने युवाहरु छन् । यसले गर्दा अहिले अधिकांश पत्ता लागेका कोरोना संक्रमितहरु विदेशबाट आउने खास गरेर भारतबाट फर्किनेहरु छन् । यदि हामीले कन्ट्याक ट्रेसिङ र परीक्षणको दायरालाई बढाउने हो भने मेरो विचारमा समुदायस्तरमा संक्रमितहरु धेरै फेला पर्छन् ।’

‘भीआईपी’ लाई पनि छोडेन 
नेपालमा भीआईपीहरुलाई पनि कोरोनाले छोडेको छैन । सम्वैधानिक अंगका प्रमुख देखि सांसद नेतासम्मलाई पनि कोरोनाले छुन थालेको छ । अख्तियार दुरुपयोग अनुसन्धान आयोगका प्रमुख नविन घिमिरेलाई कोरोना संक्रमण पोजेटिभ देखिएको छ । उनी एक साता यता घरमै आइसोलेसनमा बसेका छन् । साउन २७ मा उनलाई कोरोना संक्रमण पुष्टि भएको हो । उनीसँगै अर्का एक आयुक्तलाई पनि कोरोना पुष्टि भएको छ । 

नेपाल राष्ट बैंकका गर्भनर महाप्रसाद अधिकारी कोरोना संक्रमणको आशंकामा भंसेपाटीस्थित आफ्नै निवासमा क्वारेन्टाइनमा बसेका छन् । बैंकको केन्द्रीय कार्यालयको सामान्य सेवा विभागका एकजना इञ्जिनियरलाई गत बिहीबार कोरोना पुष्टि भएपछि अधिकारीले होम क्वारिन्टिन रोजेका छन् । 

बैंकका एक जना कर्मचारीका अनुसार, गर्भनर अधिकारीले संक्रमण पुष्टि भएका इञ्जिनियरसँग दुई दिनअघि आफ्नै कार्यालयमा भएको निर्माणसम्बन्धी विषयमा लामो छलफल र प्रत्यक्ष कुराकानी गरेका थिए । त्यसको भोलिपल्ट इन्जिनियरमा कोरोना पुष्टि भएको रिपोर्ट आएपछि अधिकारी शुक्रबारदेखि क्वारेन्टाइनमा बसेका हन् । 

वाग्मती प्रदेशका उपसभामुख राधिका तामाडमा पनि कोरोना संक्रमण पुष्टि भएको छ । उनी र उनका छोरा रिदममा कोरोना संक्रमण पुष्टि भएको हो । गृहजिल्ला नुवाकोटको दुप्चेश्वरका एक वडा अध्यक्षमा कोरोना संक्रमण पुष्टि भएपछि उनकै सम्र्पमा रहेकाहरुको खोजी गर्दा उपसभामुख तामाड पनि कोरोना संक्रमित देखिएकी हुन् । नेपाल प्रहरीका दुई जना डिआईजीमा पनि कोरोना संक्रमण पुष्टि भएको छ । महाराजगञ्जस्थित नेपाल प्रहरी अस्पतालका दुई जना डिआइजीमा कोरोना भाइरसको संक्रमण पुष्टी भएको हो ।

नेताहरुका पनि घर दैलोमै कोरोना पुगेको छ । सुरक्षाकर्मी, अंगरक्षकहरुमा समेत कोरोना देखिएको छ । यसले भिआईपीहरुलाई पनि कोरोनाले प्रताडित बनाउन थालेको छ । केन्द्रीय संसदकै एक जना सांसद भर्खर निको भएर फर्केका छन भने अर्का एक जनामा फेरि संक्रमण देखिएको छ ।

कर्णाली प्रदेशमा पनि एक जना सांसद निको भएर फर्केका छन भने अर्काे एक जना सांसदमा संक्रमण देखा परेको छ । प्रदेश २ मा एकजना मन्त्रीलाई नै संक्रमण देखिएको छ । कतिपय स्थानिय तहका प्रमुखलाई पनि संक्रमण देखिएको छ ।