चितवनका मल तस्कर भरतपुर महानगरको नाम बेच्दै जफत मल छुटाउन धाए महेशपुर भन्सार कार्यालय

चितवन । जिल्ला प्रहरी कार्यालय पश्चिम नवलपरासीबाट खटिएको टोलीले रामग्राम नगरपालिका ५ बाईपासचोकबाट शनिबार १ सय ४९ बोरा युरिया मलसहित दुई वटा बोलेरो पिकअप गाडी चालकसहित नियन्त्रणमा लिएर महेशपुर भन्सार कार्यालयलाई बुझायो । अहिले ती गाडी र मल छुटाउन मल तस्करले सक्रियता बढाएका छन् । दुवै चालकलाई धरौटीमा छुटाइएको छ ।

महेशपुर भन्सार कार्यालय प्रमुख हेमचन्द्र शर्माले मलसहित गाडी र चालक नियन्त्रणमा लिएपछि एक जना मानिस ‘मेरो आफन्त माननीय हुन् । यो मल भरतपुर  महानगरले खरिद गरेको हो । चितवन लगेर किसानलाई निःशुल्क बाँड्ने हो’ भन्दै आफूकहाँ मल छुटाउन  सिफारिस गर्न आएको बताए ।  ‘किसानलाई बाँड्ने मल भए महानगरको सिफारिस पत्र लिएर आउनु, मल र गाडी छाडिदिन्छु’ भनेर उनलाई पठाएको भन्सार प्रमुख शर्माको भनाइ छ । उनले ‘महानगरबाट मेयरको पत्र ल्याउँछु’ भनेर गएको शर्माले बताए । 

आवश्यक कागजपत्र ल्याउन नसके मल र गाडी लिलामी प्रक्रियामा जाने, कागजात पूरा गरे छाडिदिने भन्सार प्रमुख शर्मा बताउँछन् । अहिले कोरोनाको जोखिम भएका कारणले चालकलाई भने आवश्यक अनुसन्धानपछि सम्पर्कमै रहने गरी धरौटीमा छाडिएको उनले बताए ।

चालकहरुसँग थिएन कागजपत्र    

जिल्ला प्रहरी कार्यालय नवलपरासी सुस्तापश्चिमका सूचना अधिकारी डिएसपी राजु लामाले भन्सार छली ल्याइएको युरिया मल गाडीमा राखेर महेशपुरबाट परासीतर्फ आउँदै गरेको ना ४ च ८३८८ नम्बरको पिकअपबाट ७८ बोरा र ना ५ च २९२६ नम्बरको पिकअपबाट ७१ बोरा युरिया मल बरामद गरी भन्सार कार्यालयमा बुझाइएको जानकारी दिए । दुबै पिकअपका चालकसँग सोधपुछ गर्दा मलसँग सम्बन्धित कुनैपनि कागजात आफूहरुसँग नरहेको बताएपछि पिकअप र मलसहित उनीहरुलाई नियन्त्रणमा लिएर भन्सार कार्यालयमा बुझाइएको डिएसपी लामाले बताए ।

बरामद गरिएको १ सय ४९ बोरा युरिया मल १ लाख ४ हजार ३ सय मूल्य बराबरको रहेको छ । दुबै पिकअप भ्यानको मूल्य २० लाख गरी कुल २१ लाख ४ हजार ३ सय मूल्य बराबरको लिलामीका लागि भन्सार कार्यालयमा बुझाइएको प्रहरीको भनाइ छ । भरतपुर महानगरपालिका वडा नम्बर २७ का नारायण भुर्तेलले अवैधरुपमा चितवन ल्याउँदै गरेको मल प्रहरीले नियन्त्रणमा लिएको स्रोतको दाबी छ । 

वडाले नै दिएको छैन सिफारिस

हामीले यसअघि मेघौलीका नारायण भुर्तेल र नन्दु चौधरीसहितको टिमले भारतबाट अवैधरुपमा रासायनिक मल तस्करी गर्ने गरेको समाचार सार्वजनिक गरेका थियौँ । उनीहरुले हामीलाई समाचार नहाल्न अनेक प्रलोभन देखाएका थिए । वडा कार्यालयमार्फत आफूहरुले अनुमति लिएर मल ल्याएको समेत उनीहरुले बताएका थिए । 

भरतपुर महानगरपालिका वडा नम्बर २७ का अध्यक्ष गोविन्द तामाङले नारायण भुर्तेलसहितको टिमलाई धानको बिउ राख्ने बेला दुई पटकबाहेक आफूले मल ल्याउन कुनै  सिफारिस नदिएको बताए । मल ल्याउने गाडी समातिएको भनेर आफूलाई पनि एक जनाले खबर गरेको तर तिनीहरुले कहाँबाट कसरी कसको सिफारिसमा मल ल्याउनका लागि गए भन्ने जानकारी आफूलाई नभएको उनी बताउँछन् । 

यो टिम विगत दुई महिनादेखि मल कारोबारमा संलग्न रहेको स्रोतको दाबी छ । भुर्तेल स्वयम्ले पनि यसअघि हामीसँग आफूले तीन पटक वडाको सिफारिसमा मल ल्याएको बताएका थिए ।