उत्तर कोरियाले दक्षिणमा हुने ओलम्पिक्स खेलका लागि आफ्ना २२ खेलाडी पठाउने बताएपछि यसले निश्चित रुपमा दुई देशबीचको सम्पूर्ण समस्या समाधान गर्ने दक्षिण कोरियाले बताएको छ ।
आगामी महिनामा हुने ओलम्पिक्स खेलमा दक्षिण कोरिया र उत्तर कोरियाले सिङ्गो झण्डा प्रयोग गरी संयुक्त खेल खेल्ने भनिएको छ जसले कोरियाली प्रायद्विपमा लामो समयसम्मका लागि शान्ति स्थापना गर्ने विश्वास गरिएको अन्तर्राष्ट्रिय संचार माध्यमले बताएका छन् ।
यसैको तयारीमा आइतबार उत्तर कोरियाका संगीत र कला क्षेत्रका अधिकारीहरु आएर मैदानको निरीक्षण गरिसकेका छन् । दक्षिण कोरियामा हुने ओलम्पिक्स खेलले दुई देशबीचको ऐतिहासिक सम्बन्धमा सुधार ल्याउन लागेको भन्दै आइतबार ब्लु हाउसले यसप्रति खुसी व्यक्त गरेको हो ।
राष्ट्रपति मुन जे इनले पहिलेदेखि नै प्योङछाङ ओलम्पिक्सलाई उत्तर कोरियासँगको मुद्दा सुल्झाउने राम्रो अवसर रहेको बताउँदै आएका थिए ।
र यसै अनुरुप खेलको बाहानमा दुई देशबीचको समझदारी बढ्दो क्रममा रहेको उनले बताए ।
उत्तर कोरियाबाट आएका सबै अधिकारीहरुले दुई दिनसम्म खेलकुद हुने स्थानको निरीक्षण गर्ने बताएका छन् ।
गतवर्षको अत्यन्तै तनावपूर्ण परिस्थिति र अनेकौँ विवादपछि अन्त्यमा यी दुई देशबीच केही समस्या समाधान हुँदा यसलाई धेरैले सकारात्मक तरिकाले हेरेका छन् भने कतिले शंकास्पद पनि मानिरहेको अन्तराष्ट्रिय संचार माध्यमले बताएका हुन् । उत्तर कोरियाबाट आउने २२ खेलाडीहरु तीनवटा खेलमा र पाँच कार्यक्रममा सहभागी हुने बताइएको छ
प्रतिक्रिया दिनुहोस