थप ३ इजरायली बन्धक रिहा गर्दै हमास, विपिनको रिहाइबारे छैन टुंगो

काठमाडौं। हामासले गाजा क्षेत्रबाट शनिबार थप ३ इजरायली बन्धकलाई रिहा गर्ने तयारी गरेको छ। हामासले ती बन्धकहरूको नाम एली शाराबी, ओहद बेन अमी र ओर लेभी रहेको जनाएको छ।

यसअघि जनवरी १९ मा युद्धविराम शुरू भएयता १८ बन्धक रिहा भइसकेका छन्। इजरायलले हालसम्म ३८३ प्यालेस्टिनी कैदीहरूलाई मुक्त गरेको छ भने शनिबार थप १८३ कैदीलाई रिहा गर्ने बताएको छ।

युद्धविरामको पहिलो चरण ३ सातासम्म जारी रहनेछ, जसअनुसार ३३ इजरायली बन्धक र १,९०० प्यालेस्टिनी कैदीहरूको रिहाइ गरिनेछ। इजरायलका अनुसार हमासको नियन्त्रणमा रहेका ८ बन्धकको मृत्यु भइसकेको छ।

नेपाली नागरिक विपिन जोशी अझै हमासको नियन्त्रणबाट रिहा भएका छैनन् । नेपालले विपिनको रिहाइका लागि पहल गरिरहेको छ । विपिनको सम्बन्धमा आजसम्म कुनै जानकारी सार्वजनिक भएको छैन ।