नवराज कुँवर असोसियोको उपाध्यक्षमा पुनः निर्वाचित

काठमाडौँ । कम्प्युटर एसोसिएसन नेपाल महासंघ (क्यान महासंघ) का निवर्तमान अध्यक्ष नवराज कुँवर एसियन–ओसियनियन कम्प्युटिङ इन्डस्ट्री अर्गनाइजेसन (असोसियो) को उपाध्यक्षमा पुनः निर्वाचित भएका छन् ।

जापानमा सम्पन्न असोसियोको वार्षिक साधारणसभा तथा अधिवेशनबाट कुँवर आगामी सन् २०२४–२६ कार्यकालका लागि सोही पदमा पुनः निर्वाचित भएका हुन् ।

कुँवरले यसअघि पनि क्यान महासंघको प्रतिनिधित्व गर्दै असोसियोमा सन् २०२२ देखि उपाध्यक्षको भूमिका निभाउँदै आएका थिए । उनले त्यसअघि २०२०–२२ मा सह–उपाध्यक्षको जिम्मेवारी सम्हालेका थिए ।

उपाध्यक्षमा पुनः निर्वाचित भएपछि कुँवरले नेपाललाई अन्तर्राष्ट्रिय मञ्चमा स्थापित गर्ने आफ्नो प्रयासलाई थप ऊर्जा मिलेको बताएका छन् । कुँवरले भने, ‘सूचना प्रविधि क्षेत्रमा नेपाललाई अन्तर्राष्ट्रिय मञ्चमा स्थापित गर्ने प्रयास गरिरहेको छु ।

असोसियोमार्फत एसियाली देशहरूमा मजबुत प्रविधि प्रणाली बनाएर नेपाललाई विश्व आईसीटी क्षेत्रमा स्थान दिलाउन सकिन्छ । यसले एसियाका विकासशील र अविकसित देशहरूबिचको दूरीलाई पनि घटाउन मद्दत गर्ने विश्वास लिएको छु ।

नयाँ कार्यसमितिमा मलेसियाका अध्यक्ष स्टेन सिंहको नेतृत्वमा उपाध्यक्षमा नेपाल, थाइल्याण्ड, कोरिया, हङकङ, म्यानमार र जापानका सूचना तथा सञ्चार प्रविधि क्षेत्रका संगठनका प्रतिनिधिहरू निर्वाचित भएका छन् ।