मन्त्री चौरसियाले गरे पर्सा जिल्ला अदालतको अवलोकन

वीरगन्ज । कानुन,न्याय तथा संसदीय मामिला मन्त्री अजय चौरसियाले आइतबार पर्साका दुई वटा अदालतको स्थलगत अवलोकन गरेका छन् । गृह जिल्ला पुगेका कानुन मन्त्री चौरसियाले जिल्ला अदालत वीरगन्ज र उच्च अदालत जनकपुर अस्थायी इजलास वीरगन्जको स्थलगत अवलोकन गरेका हुन् ।

अदालतमा भौतिक संरचना र कर्मचारीहरूको अभावसहितका समस्या रहेको गुनासो आएपछि कानुनमन्त्री चौरसियाले बिहान दुईवटै अदालतको स्थलगत अवलोकन तथा निरीक्षण गरेका हुन् । निरीक्षणका क्रममा जिल्ला अदालत र अस्थाई इजलास वीरगन्जका प्रमुख न्यायाधीशद्वयले अदालतको भौतिक संरचना बेहाल अवस्थामा रहेको ब्रिफिङ गरेका थिए ।

जिल्ला अदालत पर्साका न्यायाधीश दीपक खनालले मन्त्री चौरसियालाई पर्सा जिल्ला अदालतमा भौतिक संरचना एकदम जीर्ण रहेको ब्रिफिङ गर्दै सबै संरचनाको स्थलगत अवलोकन समेत गराएका थिए ।

यसैगरी अस्थायी इजलास वीरगन्जका प्रमुख न्यायाधीश डा. रत्नबहादुर बागचन्दले पनि अस्थायी इजलास वीरगन्जमा भौतिक संरचनाको अभावसँगै एकदम न्यून सङ्ख्यामा कर्मचारी रहेको ब्रिफिङ गरेका थिए । 

उनले कर्मचारीका कारण जनताको काम सोचे अनुरूपको गर्न नसकिएको आग्रह गर्दै कर्मचारी थपिदिन माग गरेका थिए । निरीक्षणका क्रममा न्यायाधीश बागचन्दले मन्त्री चौरसियालाई कानुन संशोधनको मार्फत अस्थायी इजलासलाई स्थायी बनाउनमा भूमिका निर्वाह गर्न आग्रह गरेका थिए । 

दुईवटै अदालतको निरीक्षण गर्दै मन्त्री चौरसियाले जिल्ला अदालत र उच्च अदालतमा धेरै समस्या रहेको पाइएको बताए ।

उनले भने, ‘जिल्ला अदालत र अस्थायी उच्च अदालत वीरगन्जमा भवन,कर्मचारीसहितको समस्या रहेको छ, यी समस्याहरू गम्भीर छन् । म यो समस्याप्रति संवेदनशील छु । त्यसकारण सरकारको तर्फबाट हुने सबै काम यी दुई वटै अदालतका लागि गर्नेछु । कर्मचारीहरूको अभावको समस्यालाई चाँडै सम्बोधन हुने गरी पहल गर्नेछु ।’