ग्लोबल टी-२० लिग : कप्तान रोहितको टिम ५२ रनमा अलआउट

काठमाडौं । क्यानडाको ग्लोबल टी–२० लिग अन्तर्गत गएराति भएको खेलमा नेपाली राष्ट्रिय क्रिकेट टिमका कप्तान रोहितकुमार पौडेल सहभागी टोरोन्टो नेसनल्स ७ विकेटले पराजित भएको छ ।

टस हारेर सुरुमा ब्याटिङको निम्तो पाएको टोरोन्टोले ११.१ ओभरमा अलआउट हुँदा मात्र ५२ रन बनाएको थियो ।

टस जितेर सुरुमा फिल्ड रोजेको मोन्ट्रियल टाइगर्सका बलरसामू टोरोन्टोका कुनै पनि ब्यासम्यान टिक्न सकेनन् । उसका लागि जतिन्द्रपाल मथारुले १२ रन जोड्नुबाहेक कुनै पनि ब्याट्सम्यानले दोहोरो अंक जोड्न नसकेका हुन् ।

टोरोन्टोलाई सस्तैमा समेट्न मोन्ट्रियलका लागि कलीम सानाले तीन ओभर बलिङ गर्दा १३ रन खर्चिएर चार विकेट लिए भने अजमातुल्लाह उमरजाई चार ओभर बलिङ गर्दै तीन विकेट लिए । टाइगर्सको आक्रामक बलिङविरुद्ध टोरोन्टोका कुनै ब्याट्सम्यान टिक्न नसक्दा ११.१ ओभरमा ५२ रनमा अलआउट भएको हो ।

५३ रनको लक्ष्य पछ्याएको मोन्ट्रियलका लागि कप्तान टिम सेफर्टले नटआउट सर्वाधिक १५ रन बनाए । उसका लागि दिलप्रीत बाजवाले १२ रन जोडेका थिए । मोन्ट्रियलले ११.३ ओभरमा ३ विकेटको क्षतिमा ५६ रन बनाएको हो ।

यो जितसँगै मोन्ट्रियल ९ अंकसहित शीर्ष स्थानमा उक्लिएको छ । यो हारसँगै दोस्रो स्थानमा रहेको रोहितको टिम टोरोन्टो भने ७ अंकसहित चौथो स्थानमा झरेको छ । नेपालका सन्दीप लामिछाने र दीपेन्द्र सिंह ऐरीको टिम भ्यानकुभर नाइट्सभने तीन अंकसहित तालिकाको पुछारमा छ ।