महिला टी–२० एसिया कपमा नेपालको पहिलो खेल पाकिस्तानसँग

काठमाडौँ । नेपाली राष्ट्रिय महिला टोलीले एसीसी महिला टी–२० एसिया कप क्रिकेट प्रतियोगितामा आफ्नो पहिलो खेल जुलाई १९ तारिखमा पाकिस्तानसँग खेल्ने भएको छ । प्रतियोगिता जुलाई १९ देखि २८ तारिखसम्म श्रीलङ्कामा आयोजना हुँदै छ ।

एसियाली क्रिकेट काउन्सिल (एसीसी) ले नेपाली टोलीलाई समेत थप गरेर खेल तालिका सार्वजनिक गरेको हो । एसीसीले अघिल्लो संस्करणको तुलनामा टोलीको सँख्या थप गर्ने निर्णय लिएपछि नेपालले प्रतियोगिता खेल्ने अवसर पाएको हो ।

आठ टोलीको सहभागिता रहने उक्त प्रतियोगितामा नेपाली टोली समूह ‘ए’ मा परेको छ । उक्त समूहमा नेपाल र पाकिस्तानका अतिरिक्त भारत र संयुक्त अरब इमिरेट्स (यूएई) पनि रहेका छन् । नेपालले आफ्नो दोस्रो खेल जुलाई २१ तारिखमा यूएईसँग खेल्नेछ ।

यसैगरी नेपालले समूहगत चरणको अन्तिम खेल जुलाई २३ तारिखमा भारतसँग खेल्नेछ । प्रतियोगिताको समूह ‘बी’ मा बंगलादेश, मलेसिया, आयोजक श्रीलंका र थाइल्यान्ड रहेका छन् ।

यसै वर्ष भएको महिला प्रिमियर कपको सेमिफाइनलमा पराजित भएका टोलीलाई पनि प्रतियोगितामा समावेश गरिएको हो । एसियाली क्षेत्रमा महिला क्रिकेटको स्तर बृद्धि गर्दै लैजाउने उद्देश्यले एसीसीले यस्तो निर्णय लिएको हो ।

यो संस्करणमा भारत र पाकिस्तानबिचको खेल भने जुलाई २१ तारिखमा खेलिने छ । प्रतियोगिताका सबै खेल डम्बुलामा खेलाइने छ । प्रारम्भिक चरणको समाप्तिपछि दुबै समूहबाट दुई–दुई टोली प्रतियोगिताको  सेमिफाइनलमा प्रवेश गर्नेछन् ।

प्रतियोगिताको दुबै सेमिफाइनल खेल जुलाई २६ तारिखमा खेलिने छ । फाइनल खेल भने जुलाई २८ तारिखमा खेलाइने छ ।

खेल तालिका

जुलाई १९- नेपालविरुद्ध पाकिस्तान

जुलाई १९- भारतविरुद्ध यूएई

जुलाई २०- मलेसियाविरुद्ध थाइल्यान्ड

जुलाई २०- श्रीलंकाविरुद्ध बंगलादेश

जुलाई २१- नेपालविरुद्ध यूएई

जुलाई २१- भारतविरुद्ध पाकिस्तान

जुलाई २२- श्रीलंकाविरुद्ध मलेसिया

जुलाई २२- बंगलादेशविरुद्ध थाइल्यान्ड

जुलाई २३- पाकिस्तानविरुद्ध यूएई

जुलाई २३- नेपालविरुद्ध भारत

जुलाई २४- बंगलादेशविरुद्ध मलेसिया

जुलाई २४- श्रीलंकाविरुद्ध थाइल्यान्ड

जुलाई २६- दुबै सेमिफाइनल

जुलाई २८- फाइनल