४० वटा कानुन तत्काल निर्माण गर्नुपर्ने आवश्यकता छ : सांसद पन्त

काठमाडौँ । राष्ट्रियसभा सदस्य कमला पन्तले ४० वटा कानून तत्काल निर्माण गर्नुपर्ने अहिलेको आवश्यकता रहेको बताएकी छन् । बिहीवारको राष्ट्रिय सभाको बैठकमा बोल्दै उनले यस्तो बताएकी हुन् ।

उनले विगतका सकारात्मक अनुभवहरुबाट अघिल्ला पाइलाहरुलाई देश र जनताको पक्षमा परिणामदायी बनाउन संकल्प गर्नु अहिलेको आवश्यकता भएको बताइन् । उनले समुन्नत नेपाल निर्माणको आधार खडा गर्न युद्धस्तरमा काम गर्नुपर्ने भएकाले विश्राम गर्ने छुट नरहेको जिकिर गरिन् ।

उनले भनिन्– ‘संविधान निर्माण भइसकेपछि कानून कति निर्माण गर्न बाँकी छ, भन्नेकुरा पनि विधायन समितिले अध्ययन गरिसकेको छ । ४० वटा कानुन तत्काल निर्माण गर्नुपर्ने अहिलेको आवश्यकता छ । शान्ति प्रक्रियाको लजिकल इन तथा समुन्नत नेपाल निर्माणको आधार खडा गर्न युद्धस्तरमा काम गर्नुपर्नेछ । हामीलाई विश्राम गर्ने छुट छैन ।’

उनले शक्ति निक्षेपणको सिद्धान्तका आधारमा स्थानीय तह र प्रदेश तहलाई थप शक्तिशाली साधन श्रोत सम्पन्न र दक्ष तुल्याइ संघीयताको अर्थपूर्ण अभ्यासलाई बिस्तार गर्न ढिला गर्नु नहुने बताइन् ।