भरतपुर मेयर्स कपको उपाधी अर्किडले जित्यो

चितवन  । विद्यालय स्तरीय भरतपुर मेयर्स कपको उपाधी अर्किड स्कुलले जितेको छ । गौतमबुद्ध अन्तर्राष्ट्रिय क्रिकेट रंगशालाको नमुना क्रिकेट मैदानमा शनिवार भएको फाइनल खेलमा अर्किडले वाल्मीकि शिक्षा सदनलाई २० रनले पराजित गरेको हो ।

टस जितेर पहिले व्याटिङ रोजेको अर्किडले पुरै ओभर खेलेर ६ विकेटको क्षतिमा १३० रन बनाउन सफल भयो । १३१ रनको विजयी लक्ष्य पछ्याएको वाल्मीकिले १९ दशमलव १ ओभर खेल्दा पुरै विकेट गुमाएर ११० रन मात्रै जोड्न सक्यो ।

एक्सपर्ट एजुकेसन एण्ड भिजा सर्भिसेज चितवनले लिग खेल्ने १० विद्यालयलाई जर्सी प्रदान गरेको थियो । त्यसैगरी एक्स्पर्टले प्रतियोगितामा सहभागी १० सामुदायिक विद्यालयलाई पनि क्रिकेट किट सहयोग गरेको थियो । एक्स्पर्टले विजेता टिमलाई ६० हजार रुपैयाँ र उपविजेता टिमलाई ३० हजार रुपैयाँ बराबरका क्रिकेट खेलकुद सामग्री पनि दिएको छ । प्रतियोगिताको सहआयोजकमा चितवन जिल्ला क्रिकेट संघ रहेको थियो ।