मञ्चमा देखिएको एकता देश रुपान्तरणमा पनि देखियोस्: रवि लामिछाने

चितवन। राष्ट्रिय स्वतन्त्र पार्टीका सभापति तथा चितवन–२ का सांसद रवि लामिछानेले मञ्चमा देखिएको शीर्ष नेताहरुको एकता देश रुपान्तरणमा पनि देखिनुपर्ने बताएका छन् ।भरतपुर भ्रमण वर्षको उद्घाटन कार्यक्रममा शुभकामना मन्तव्य राख्दै लामिछानेले मञ्चमा देखिएका सबै दलका शीर्ष नेताहरुलाई संकेत गर्दै यो एकता देशको रुपान्तरणमा पनि देखिनुपर्ने बताएका हुन् ।

उनले भने, ‘मञ्चमा देखिएको कम देख्ने दृश्य हो । त्यो भन्दा राम्रो दृश्य बन्न सकोस् । राष्ट्रिय मुद्दामा एक बन्न सकौं । भविष्यका पूर्वप्रधानमन्त्रीहरु र भविष्यका प्रधानमन्त्रीहरु मञ्चमा हुनुहुन्छ । शक्ति यता छ । यहाँको शक्तिले जनताको त्यहाँको शक्तिलाई चिन्नेछ तब देशले मुहार फेर्नेछ ।

लामिछानेले आफू भ्रमण वर्षको सफलताको लागि उपस्थित भएको बताए । उनले भरतपुर महानगरमा भएका राम्रा कामको आफूले प्रशंसा गर्ने बताए । उनले भने, ‘भरतपुर भ्रमणको लागि देश र विदेशका सबैलाई आव्हान गर्न चाहन्छु । सिंगो साथ, सहयोग का लागि भूमिका निर्वाह गर्न तयार छु ।’