मुख्यमन्त्री जम्कट्टेलद्वारा एक वर्षको अवधिमा गरेको प्रगति विवरण सार्वजनिक

काठमाडौँ। शालिकराम जम्कट्टेल नेतृत्वको बागमती प्रदेश सरकारले एक वर्ष पूरा गरेको अवसरमा सरकारले एक वर्षको अवधिमा गरेको प्रगति विवरण सार्वजनिक भएको छ ।

आज हेटौँडामा एक वर्षको कामहरूको सार्वजनिकरण कार्यक्रमको आयोजना गर्दा मुख्यमन्त्री जम्कट्टेलले बागमती प्रदेश सरकारले एक वर्षको अवधिमा प्रदेशभर १ सय ७२ किलोमिटर सडक पिच गरिएको बताए ।

एक वर्षको अवधिमा सरकारले सात वटा ऐन प्रदेशसभामा पेश गरेको उनको भनाई थियो । सरकारले एक वर्षको अवधिमा पाच वटा नियमावली राजपत्रमा प्रकाशन गरेको रिर्पोट कार्डमा उल्लेख छ ।

प्रदेश सरकारले एक वर्षको अवधिमा प्रदेश श्रम तथा रोजगार नीति २०८०, प्रदेश बालबालिकासम्बन्धी नीति २०८०, मानव बेचबिखन ओसारपसार विरुद्धको नीति २०८०, प्रदेश निजामती ऐन २०७९, स्थानीय सेवा गठन तथा सञ्चालन ऐन २०७९, प्रदेश सरकारी कामकाजको भाषा ऐन २०८० पारित गरेको छ ।

यो अवधिमा सरकारले मदन भण्डारी स्वास्थ्य विज्ञान प्रतिष्ठान ऐन २०७६ (संशोधन) सालबसाली विनियोजन तथा आर्थिक ऐनहरू, प्रदेश सञ्चार माध्यम व्यवस्थापन ऐन २०७५९संशोधन०, प्रदेश उच्च शिक्षा नियमावली २०७९ पारित गरेको छ ।

सरकारले एक वर्षको अवधिमा ३३ विद्यालयमा घेरबार गर्नुको साथै ३१ वटा शौचालय निर्माण गरेको जनाएको छ । सरकारले एक वर्षमा हेटौँडा अस्पताललाई ३ सय शय्या, सिन्धुली र धादिङको सरकारी अस्पताललाई १०० शय्या, चौतारा रामेछाप र पशुपति चौलागाई स्मृति अस्पताललाई ५० शय्या बनाउने निर्णय गरेको छ ।

बागमती प्रदेशको ८ जिल्लामा निर्माणाधीन शितभण्डारको काम ८५ प्रतिशत पुग्नु पनि सरकारले सफलताको श्रेणीमा राखेको छ ।