माधव नेपालको लुम्बिनी भ्रमणः मायादेवी मन्दिरमा पूजा, अशोक स्तम्भ अवलोकन

बुटवल। नेकपा (एकीकृत समाजवादी)का अध्यक्ष माधवकुमार नेपालले गौतमबुद्ध जन्मस्थल लुम्बिनीको अवलोकन भ्रमण गरेका छन् । पूर्वप्रधानमन्त्री नेपाललाई संविधानसभा सदस्य तथा लुम्बिनी विकास कोषका उपाध्यक्ष  प्रथम योल्मो खेन्पो (छिमे छिरिङ), डा ल्हारक्याल लामा, सदस्य सचिव सानुराजा शाक्य, कोषाध्यक्ष शिद्धिचरण भट्टराई  प्रशासकीय अधिकृत ज्ञानिन राई लगायतले स्वागत गरेका थिए ।

नेता नेपालले लुम्बिनीस्थित मायादेवी मन्दिरको पूजा गर्नुका साथै अशोक स्तम्भ, पुस्करणी पोखरी, शान्ति दीपको समेत भ्रमण गरेका थिए । सो अवसरमा पूर्वप्रधानमन्त्रीसमेत रहेका नेपाललाई लुम्बिनीको गुरुयोजना, कोषका पछिल्ला गतिविधिका बारेमा जानकारी गराइएको थियो ।

नेपालले लुम्बिनीलाई वृहत् क्षेत्रको हिसाबले विकास गरी विश्वकै पर्यटकीय केन्द्र बनाएर यसको विकासका लागि पहल गर्न उपाध्यक्ष डा लामालाई शुभकामना दिएका थिए ।उनले लुम्बिनीलगायत बुद्धसँग सम्बन्धित पुरातात्विक क्षेत्रलाई समेटेर वृहत्तर लुम्बिनीका रुपमा विकासमा सहयोग गर्नेसमेत प्रतिबद्धता जनाए ।