नागरिकको गुनासो सुन्न भरतपुरमा प्रदेशका स्वास्थ्य मन्त्री जोशीको सम्पर्क कार्यालय स्थापना

चितवन। चितवनमा बागमती प्रदेशका सांसद उत्तम जोशीको सम्पर्क कार्यालय स्थापना गरिएको छ ।आफ्नो क्षेत्रको जनताका गुनासा सुन्नका लागि भरतपुर महानगरपालिका–१० स्याउली बजारमा स्थापित कार्यालयको आज (आइतबार) उद्घाटन गरिएको हो ।

आफू जनताको सेवा गर्नका लागि नै नेतृत्वमा गएको भन्दै उनले आफ्नो कार्याकलभर जनताले आभास गर्ने गरी कार्यसम्पादन र विकास निर्माणमा अघि बढ्ने बताए । जोशी गत मंसिर ४ मा सम्पन्न प्रदेश सभा निर्वाचनमा चितवन–२ (ख) बाट निर्वाचित भएका थिए ।

यसैबीच जोशीले स्वास्थ्य मन्त्रीको रुपमा मन्त्रालयमा हुने अनावश्यक खर्च कटौती गर्ने प्रतिबद्धता जनाए । जोशीले आफूले मन्त्रालय सम्हाले लगत्तै केही महत्वपूर्ण निर्णयहरु गरेको जानकारी दिँदै कार्यान्वयनमा कुनै कमी हुन नदिने उनले बताए । जनताको मन जितेर स्वास्थ्य मन्त्रालय पुगेको भन्दै जनताको मन जित्ने गरी काम गरेर फर्किने दृढताका साथ अघि बढ्ने उनको भनाइ थियो ।