पोखरा । गण्डकी प्रदेशका मुख्यमन्त्री पृथ्वीसुब्बा गुरुङले आगामी पाँच वर्षभित्र प्रदेशका सम्पूर्ण स्थानीय तहमा कम्तीमा पनि एउटा खेलकूद मैदान निर्माण गरिने बताउनुभएको छ ।
अखिल नेपाल पूmटबल संघ एन्फाको कार्य नीति, आधारभूत क्षेत्र, विधान र नियमावलीको प्रदेशस्तरीय अन्तक्रिया एवम् कार्यशाला गोष्ठीको आज पोखरामा उद्घाटन गर्दै उहाँले खेलकुदको विकासका लागि भौतिक पूर्वाधार पहिलो आवश्यकता रहेको बताउनुभयो ।
गण्डकी प्रदेशका ११ जिल्लाका ८५ वटा स्थानीय तहसँग समन्वय गरी खेलकुद मैदान निर्माण गरिने योजना रहेको बताउँदै उहाँले त्यसका लागि स्थानीय तहको महत्वपूर्ण भूमिका रहने उल्लेख गर्नुभयो ।
राष्ट्रियतालाई बलियो बनाउन खेलकुद क्षेत्रको महत्वपूर्ण भूमिका रहेको बताउँदै मन्त्री गुरुङले प्रदेश सरकारले अन्तर्राष्ट्रियस्तरको रंगशाला निर्माणका लागि आवश्यक तयारी गरिरहेको बताउनुभयो ।
प्रदेशसभा सदस्यहरू मनबहादुर गुरुङ, दिपक कोइराला, बिन्दु थापा, राजमीप्रसाद बराल, राजीव पहारी, मोहन रेग्मीलगायतले खेलकूदको विकासका लागि विधि, पद्धतिअनुसार सञ्चालन हुनु पर्ने बताउनुभयो ।
अखिल नेपाल फुटवल संघका अध्यक्ष कर्माछिरिङ शेर्पाले नेपाली फुटवल विकासको लागि मुलुकका तीनै तहका सरकारले लगानी बढाएर भौतिक पूर्वाधारमा जोड दिनुपर्ने बताउनुभयो ।
मुलुकका सातवटै प्रदेशमा खेलका विभिन्न विधामा टेक्निकल सेन्टर सञ्चालन गर्ने तयारी भइरहेको बताउँदै उहाँले फुटबल खेलको विकासका लागि एन्फाले पहिलो चरणमा ८० जना राष्ट्रियस्तरका प्रशिक्षक उत्पादन गर्न लागेको जानकारी दिनुभयो ।
एन्फाले यसअघि मुलुकका छवटा प्रदेशमा यस्ता कार्यक्रम सञ्चालन गरेर आवश्यक सुझाव संकलन गरिसकेको उपाध्यक्ष कृष्ण थापाले बताउनुभयो । (रासस)
प्रतिक्रिया दिनुहोस