हैजाको रोकथामका विषयमा गृहमन्त्री र सुरक्षा निकायका प्रमुखबीच छलफल

काठमाडौँ । गृहमन्त्री बालकृष्ण खाँणले काठमाडौँलगायतका स्थानमा देखा परेको कलेरा (हैजा)बारे सम्बन्धित पक्ष र सुरक्षा निकायका प्रमुखसँग छलफल गरेका छन्।

गृहमन्त्री खाँणले शनिबार बिहान स्वास्थ्य सचिव डाक्टर रोसन पोखरेल, नेपाल प्रहरीका महानिरीक्षक धिरजप्रताप सिंह, सशस्त्र प्रहरी बलका महानिरीक्षक राजु अर्याल, प्रहरी अस्पतालका प्रमुख डाक्टर आशा सिंह, सशस्त्र प्रहरी अस्पतालका प्रमुख रुपक महर्जनसङ्ग केही दिनदेखि देखा परेको कलेराको अवस्था र रोकथाम गर्न अपनाउनुपर्ने आवश्यक कदमका बारेमा छलफल गरेका हुन्।

उनले खानेपानीको अवस्था कस्तो छ? खानेपानीको अवस्था ठीक नभएमा पानीको परीक्षण कसरी गर्ने, त्यसका लागि तयारी के छ? भनेर जानकारी लिएका थिए।

यस्तै, सङ्क्रमित विरामीको उपचारबारे पनि उनले जानकारी लिएका थिए। सशस्त्र प्रहरी अस्पतालका प्रमुख डाक्टर महर्जनले कलेराको अहिलेको अवस्था र रोकथामबारे भएका तयारीबारे गृहमन्त्री खाँणले जानकारी लिएको बताए।गृहमन्त्री खाँणले अवस्था जटिल बन्दै गएमा स्वास्थ्य तथा जनसंख्या मन्त्रालयको सम्योजनमा नेपाल प्रहरी र सशस्त्र प्रहरीका चिकित्सकहरूले पनि कलेराको रोकथाम र नियन्त्रणमा खटिनु पर्ने अवस्था आउन सक्ने भन्दै गृहमन्त्री खाँणले त्यसकालागि तयारी अवस्थामा रहन निर्देशन दिए।

उनले नेपाल प्रहरी र सशस्त्र प्रहरीका ब्यारेकमा खानेपानीको अवस्थाबारे जानकारी लिँदै जवानहरूलाई कलेराले प्रभावित पार्न नदिन विशेष ध्यान दिन पनि निर्देशन दिए।

नेपाल प्रहरी र सशस्त्र प्रहरीलाई कलेरा प्रभावित क्षेत्रको अवलोकन गरी स्थानीयमा कलेरा फैलने अवस्था कस्तो छ, रोकथामका लागिके के उपाय अपनाइएको छ, त्यसबारे जानकारी लिन निर्देशन दिएका छन्।

प्रहरी अस्पतालका प्रमुख डाक्टर सिंहले कलेराको अवस्था र अस्पतालको तयारीबारे गृहमन्त्रीले जानकारी लिएको बताए।