महालक्ष्मी विकास बैंकद्वारा शौचालय निर्माणमा डेढ लाख सहयोग

चितवन । महालक्ष्मी विकास बैंक नारायणगढ शाखाले सामुदायिक विद्यालयको शौचालय निर्माणको लागि डेढ लाख रुपैयाँ सहयोग गरेको छ ।

बैंकका नारायणगढ शाखा प्रमुख वीरेन्द्रकुमार चौधरीले भरतपुर महानगरपालिका वडा नं ११ मा रहेको जखडीमाई राष्ट्रिय आधारभूत विद्यालयलाई शौचालय निर्माणको लागि डेढ लाख रुपैयाँ सहयोग गरेको जानकारी दिए । आजै बैंकले एक कार्यक्रमको आयोजना गरी सहयोग रकम हस्तान्तरण गरेको छ । 

विद्यालयको शौचालय रोटरी क्लब अफ भरतपुरको समन्वयमा निर्माण भइरहेको छ । ‘रोटरी क्लब अफ भरतपुरले शौचालय निर्माण गरेको छ, त्यसमा रोटरीलाई सहजताको लागि महालक्ष्मी विकास बैंक नारायणगढले थप सहयोग गरेको हो’ शाखा प्रमुख चौधरीले जानकारी दिए । बैंकले रकम हस्तान्तरण पनि रोटरी क्लब अफ भरतपुरका अध्यक्ष सुरेशसेन ठकुरीलगायतको टोलीलाई गरेको थियो । 

रकम हस्तान्तरणपछि अध्यक्ष ठकुरीले महालक्ष्मी विकास बैंकले शौचालय निर्माणमा सहयोग गरेकोमा उच्च प्रशंसा गरेका थिए । अध्यक्ष ठकुरीले निम्न वर्गका २०० विद्यार्थीै अध्ययन गर्ने जखडीमाईको विद्यालयको शौचालण अत्यन्तै जीर्ण रहेको हुनाले सहयोग गरेको बताए । शौचालय निर्माणपछि विद्यालयको वातावरण सफा भई विद्यार्थीहरुको मानसिकतामा पनिज सकारात्मक प्रभाव पर्ने अध्यक्ष ठकुरीको भनाइ थियो । 

महालक्ष्मी विकास बैंकका नारायणगढ शाखा प्रमुख चौधरीले सामाजिक उत्तरदायित्व कार्यक्रमअन्तर्गत शौचालय निर्माणलाई आर्थिक सहयोग गरेको बताए । उनले भने, ‘यसअघि पनि महालक्ष्मी विकास बैंकको नारायणगढ शाखाले मञ्जुश्री असहाय केन्द्रमा खाना खुवाउने कार्य, छात्रवृत्ति वितरण, डस्टविन वितरण, देवघाटको गलेश्वर आश्रममा सिसिटिभी हस्तान्तरणलगायत सरसफाइका विभिन्न कार्यक्रम गरेको छ ।’ 

महालक्ष्मी विकास बैंकको नेपालभरि १०२ शाखामार्फत सेवा दिइरहेको छ । यस बैंकको चितवनमा नारायणगढमा, १ भरतपुरमा १ र पूर्वीचितवनको टाँडी र खुरखुरेमा १\१ गरी ४ वटा शाखा रहेको छ । महालक्ष्मी विकास बैंकको केन्द्रीय कार्यालय काठमाडौँले यसअघि कोभिड १९ नियन्त्रणको लागि सात वटा प्रदेशलाई ५० लाख सहयोग गरेको थियो ।