आदिवासी जनजातिको असन्तुष्टि : ‘असोज ३ कालो दिन’

चितवन । नेपाल आदिवासी जनजाति महासंघ जिल्ला समन्वय समिति चितवनले संविधान दिवसलाई कालो दिनको रुपमा मनाउने भएको छ । 

मंगलबार भरतपुरमा पत्रकार सम्मेलन गरी महासंघले संविधान दिवस नमनाउने जानकारी गराएको हो । ‘असोज ३ कालो दिन’ भन्ने नाराका साथ केन्द्रको सर्कुलर अनुसार जिल्लामा विभिन्न विरोधका कार्यक्रम गर्ने महासंघले जनाएको छ ।

संविधान जारी भएको ४ वर्ष बितिसक्दा पनि आदिवासी जनजाति, महिला, दलित लगायत पछाडि पारिएका समुदायको माग सम्बोधन हुन नसकेकोले संविधान दिवसलाई कालो दिनका रुपमा मनाउने निर्णय गरिएको महासंघ चितवनका अध्यक्ष सुरविर थापाले बताए । 

उनले संविधानलाई संसोधन गरी पुर्ण बनाउनुपर्नेमा जोड दिएका छन । अपूरो संविधानलाई संशोधन गरी पूर्ण बनाउनुको साटो सरकारले समानुपातिक समावेशिताको मर्म विपरीत विभिन्न विधेयकहरु ल्याइरहेकाले विरोध गर्नु परेको अध्यक्ष थापाको भनाई छ । 

सरकार संविधान, संघीयता, समानुपातिक समावेशिता, लोकतान्त्रिक गणतन्त्रको मर्म विपरीत अघि बढिरहेकाले संविधान स्वीकार्य नभएको महासंघका सचिव महेन्द्र दुराले बताए । दुराले विभिन्न समयमा आदिवासी जनजाति महासंघ र सरकारबीच भएका सम्झौतालाई कार्यान्वयन गर्नु पर्ने र संविधान संशोधन गरी माग सम्बोधन गरेर संविधान दिवसमा दिपावली गर्ने वातावरण बनाउनु पर्नेमा जोड दिएका छन् । 

महासंघका सल्लाहकार पदमबहादुर गुरुङले संविधानमा धेरै कुराहरु समेटिए पनि यो पूर्ण नभएको बताए । सबै कुरा एकैपल्ट पूर्ण नभए पनि जायज मागहरुलाई क्रमश संशोधन गर्दै जानु पर्ने गुरुङको भनाई छ । उनीहरुले अहिले सरकारमा रहेका विभिन्न पदका शीर्ष व्यक्तिहरु आदिवासीमैत्री बन्न नसक्दा समस्या समाधान हुन नसकेको आरोप लगाएका छन् ।