सत्यनिरुपण आयोगमा रमण श्रेष्ठकै सम्भावना बलियो

काठमाडौं । प्रमुख राजनीतिक दलहरुका बीचमा सत्य निरुपण तथा मेलमिलाप आयोगको अध्यक्ष कसलाई बनाउने भन्नेमा लामैैं रस्साकस्सी चलेपनि आयोगको अध्यक्षमा पूर्व महान्याधिवक्ता रमण श्रेष्ठकै सम्भावना बलियो देखिएको छ ।

कांग्रेस र नेकपाले आयोग अध्यक्षका लागि अगाडी सारेको फरक–फरक नाममा सहमति जुट्न नसकेपछि ४ भदौंमा प्रधानमन्त्री केपी ओली, नेकपा अध्यक्ष प्रचण्ड र कांग्रेस सभापति शेरवहादुर देउवाबीचको छलफलमा श्रेष्ठको नाम सर्वसम्मत बनेको थियो ।

ओलीले गोविन्द बन्दी र देउवाले सूर्य ढुंगेललाई अध्यक्ष बनाउन चाहेका थिए । तर दुवै नाममा सहमति नबनेपछि प्रधानमन्त्री ओलीले सहमति जुटाउन देउवा र प्रचण्डलाई जिम्मा दिएका थिए ।

त्यसपछिको छलफलमा पनि आयोग अध्यक्षमा दुवै पक्षका आ–आफनो अडान रहेपछि विकल्पका रुपमा पूर्व महान्यायधिवक्ता श्रेष्ठको नाम कांग्रेस सभापति देउवाले नै अगाडी सारेका थिए ।

वाम पृष्ठभूमिका श्रेष्ठको नाम कांग्रेस सभापति देउवाले नै अगाडी सारेपछि त्यसैमा सहमति बन्यो । प्रमुख तीन नेतासहितको छलफलले श्रेष्ठलाई आयोग अध्यक्ष बनाउने अनौपचारिक सहमति पनि गरे ।

तर श्रेष्ठले यही बीचमा आफुले आयोगको नेतृत्व नलिने सार्वजनिक टिप्पणी गरिदिए । नेताहरुबाट आफुलाई आयोग अध्यक्ष बन्न प्रस्ताव आएपनि नबन्ने प्रतिक्रिया उनले दिए । तर पनि श्रेष्ठ नै आयोग अध्यक्ष बन्ने सम्भावना फेरि वलियो वनेर गएको तर्क अहिले राजनीतिक वृत्तमा चुलिएको छ ।

यो बीचमा शान्ति प्रक्रियाका सत्य निरुपण तथा मेलमिलाप र वेपत्ता छानविनका काम बाँकी छन् । यी कामका लागि दुई छुटाछुटै आयोग गठन गरेर निरुपण गर्ने दलहरुले तयारी गरेका छन् । यस अगाडीका दुवै आयोगले काम नसकेपछि पून नयाँ नेतृत्ववाट काम गराउन खोजिएको हो ।

यसका लागि आयोगमा रहनेहरुको नाम सिफारिस गर्न सरकारले गत चैत १२ गते सर्वाेच्च अदालतका पूर्व प्रधानन्यायधिस ओमप्रकाश मिश्रको संयोजकत्वमा सिफारिस समिति बनाएको थियो ।

यो समितिले लामो समय सम्म नाम सिफारिस गर्न नसकेको भनी आलोचना भईरहेका बेला राजनीतिक दलका शीर्ष नेतृत्वमा बनेको समझदारी पछि समितिले अव नाम सिफारिस गर्ने तयारी गरेको छ ।

सिफारिस समितिको बैठक आजै बस्दैछ । समितिको बैठकले सत्य निरुपणमा यस अगाडी नाम दर्ता भएका सहित रामण श्रेष्ठको पनि नाम थप गरेर सिफारिस गर्ने र वेपत्ता आयोगमा पूरानै टिमको नाम सिफारिस गर्ने तयारी गरेको छ ।

प्रधानमन्त्री केपी ओली सम्मले सिंगापुरमै रहेर संसदीय दलका उपनेता सुवास नेम्वाङलाई आयोग गठनका प्रगतिका विषयमा जिज्ञासा राखेपछि नेम्वाङले प्रगति उन्मुख भएको प्रतिक्रिया दिएका थिए । स्रोतका भनाईमा नेम्वाङले प्रधानमन्त्रीलाई सुनाएको प्रगति उन्मुख परिणाम भनेकै आयोग अध्यक्षमा बस्न श्रेष्ठ तयार भएको भन्ने रहेको एक नेताले बताए । सिफारिस समितिले आज बैठक वसेर श्रेष्ठ सहितको नामको सूचि सार्वजनिक गर्ने र सिफारिस उम्मेदवारका विषयमा प्रतिक्रिया लिनका लागि तीन दिनको समय दिने गरी तयारी भएको छ ।

२० भदौंमा ओली स्वदश फर्केपछि बस्ने क्याविनेट बैठकले आयोग पदाधिकारी नियुक्ति गर्ने तयारी भएको छ ।