‘ए’ डिभिजनल लिग : १०औँ  चरणका खेल आजदेखि

शुक्रबार, ०६ पुस २०७५, १२ : २८
‘ए’ डिभिजनल लिग : १०औँ  चरणका खेल आजदेखि

काठमाडौँ । जारी शहीद स्मारक ‘ए’ डिभिजन लिग फुटबल प्रतियोगिताको १०औँ चरणका खेल आजदेखि हुँदैछन् । अखिल नेपाल फुटबल सङ्घ (एन्फा)का अनुसार १०औँ चरणमा खेल शुक्रबार तीन, शनिबार र आइतबार दुई/दुई खेल हुनेछन् । 

शुक्रबार पहिलो खेल सरस्वती युथ क्लब र मच्छिन्द्र क्लब तथा दोस्रो खेल हिमालयन शेर्पा क्लब र फ्रेण्ड्स क्लबबीच हुनेछ । दुवै खेल एन्फा मैदान सातदोबाटोमा हुनेछन् । तेस्रो खेल जावलाखेल युथ क्लब र न्यूरोड टिम एनआरटीबीच हुनेछ । खेल हल्चोकस्थित सशस्त्र प्रहरी बलको खेलमैदानमा हुनेछ । 

त्यसैगरी शनिबार दुई खेल हुनेछन् । पहिलो खेलमा थ्रीस्टार र च्यासल युथ क्लबबीच खेल हुनेछ भने दोस्रो खेल सङ्कटा क्लब र ब्रिगेड ब्वाइजबीच हुनेछ । दुवै खेल हल्चोकस्थित सशस्त्र प्रहरी बलको खेलमैदानमा हुनेछ । 

दशौँ चरणको अन्तिम खेल आइतबार हुनेछ । आइतबार पहिलो खेल दुई विभागीय टोली त्रिभुवन आर्मी र एपिएफबीच हुनेछ । दोस्रो खेल नेपाल पुलिस र मनाङमस्र्याङ्दी क्लबबीच हुनेछ । 

लिगअन्तर्गत नवौँ चरणका खेल सकिँदासम्म मनाङ शतप्रतिशत नतिजासहित २७ अङ्कको साथ तालीकाको शीर्ष स्थानमा छ । मनाङलाई पछ्याइरहेको सङ्कटाको २४ अङ्क रहेको छ । २२ अङ्कका सात थ्रीस्टार तेस्रो, १८ अङ्कका साथ त्रिभुवन आर्मी चौथो, १५ अङ्कसहित नेपाल पुलिस पाँचौँ, १४ अङ्कका साथ हिमालयन शेर्पा छैटौँ, १३ अङ्कका साथ च्यासल युथ क्लब सातौँ स्थानमा छन् । 

यसैगरी १३ अङ्कका साथ एपिएफ आठौँ, १० अङ्कका साथ सरस्वती नवौँ, आठ अङ्कका साथ जावलाखेल युथ क्लब १०औँ, ब्रिगेड ब्वाइज, फ्रेण्डस, मच्छिन्द्र र न्यूरोड टिम (एनआरटी) क्रमशः ५, ५, ३ र १ अङ्कसहित ११औँ, १२औँ, १३औँ र १४औँ स्थानमा छन् । लिगको कूल ९१ खेलमध्ये हालसम्म ६२ खेल सकिइसकेको छ भने अब २९ खेल बाँकी रहेका छन् । 

फिफा वरियतामा नेपाल एक स्थानमाथि 
विश्व फुटबल महासङ्घ (फिफा) वरियतामा नेपाल एक स्थान माथि उक्लेको छ । विश्व फुटबलको सर्वोच्च निकाय फिफाले आज जारी गरेको नयाँ वरियतामा नेपाल एक स्थान सुधार गर्दै १६१औँ स्थानमा उक्लेको हो । अघिल्लो दुई महीनामा भने नेपाल एक/एक स्थान तल झरेको थियो । 

वरियताअनुसार दक्षिण एशियामा नेपाल तेस्रो स्थानमा रहेको छ । भारत सबैभन्दा अघि ९७ औँ स्थानमा यतावत् छ भने माल्दिभ्स १५२औँ, भुटान १८६ औँ, बङ्गलादेश १९२ औँ र पाकिस्तान १९९ औँ र श्रीलङ्का २०१औँ स्थानमा स्थानमा यथावत् छन् । 

विश्व वरियतामा बेल्जियम शीर्ष स्थानमा यथावत् रहँदा फिफा विश्व कप, २०१८ विजेता फ्रान्स दोस्रो स्थानमा छ । यस्तै ब्राजिल तेस्रो, क्रोएसिया चौथो, इङ्गल्याण्ड पाँचौँ, पोर्चुगल छैटौँ, उरुग्वे सातौँ, स्वीट्जरल्याण्ड आठौँ, स्पेन नवौँ र डेनमार्क दशौँ स्थानमा यथावत् छन् ।  (रासस) 

प्रतिक्रिया दिनुहोस