प्रचण्डलाई मेटमणिको आग्रह– देउवासँगको सम्बन्ध सन्तुलनमा राख्नुहोला, चार महिनापछि परिस्थिति अनुकूल हुन्छ

काठमाडौं। नेकपा (एकीकृत समाजवादी)मा नेता मेटमणि चौधरीले अहिले बनेको नयाँ समीकरणमा पनि चार महिनापछि फाटो आउने दाबी गरेका छन् । 

प्रधानमन्त्री पुष्पकमल दाहाल प्रचण्डले विश्वासको मत लिन गरेको प्रस्तावमाथिको छलफलमा भाग लिँदै चौधरीले चार महिना धैर्यता गरे अब बन्ने सरकार फेरि टुट्ने दाबी गरेका हुन् । ‘आजको परिस्थितिजस्तो भए पनि कांग्रेस सभापति शेरबहादुर देउवालाई दोषी नदेख्नुहोला ।

उहाँसँगको सम्बन्धलाई सन्तुलनमा राख्नुहोला । मिति गनेर राख्नुहोला, एक सय प्रतिशत पक्का छ चार महिनामा परिस्थिति तपाईं (प्रचण्ड)को अनुकूल भइहाल्छ । यसैले सबैसँग सन्तुलन रहेर व्यवहार राखेर व्यवहार गर्नुस् ।’

चौधरीले अब केपी ओली प्रधानमन्त्री बन्दा फेरि पनि संसद् विघटन हुन सक्ने भन्दै साक्षी नबस्न पनि देउवासँग आग्रह गरे । ‘नेपालको राजनीतिक व्यवस्थालाई कमजोर बनाउनेगरी संसद् विघटन हुने गरी साक्षी नबस्नुहोला ।

एक सय प्रतिशत यो हुन्छ,’ चौधरीले भने, ‘चार महिनापछि आजको प्रधानमन्त्रीजस्तो हालत अर्को प्रधानमन्त्रीको हुन्छ। छल गर्‍यो मायाले भन्ने गीत छ । चार महिनापछि यस्तो गीत गुन्गुनाउन नपरोस् ।’आफ्नो नेताको कमजोरीलाई जाले रुमालले छोपेको नसुहाएको भन्दै एमाले अध्यक्ष केपी ओलीले संविधानको धारा ७६(२) पछि ७६(३) आउने व्याख्याको अपव्याख्या गरेको उनले बताए ।

प्रधानमन्त्री प्रचण्ड अस्थिर चञ्चल स्वभाव भए पनि नियतमा खोट नभएको उनले बताए । ‘तपाईं अस्थिर र चञ्चल हुनुहुन्छ । तर, नियतमा खोट छैन,’ चौधरीले भने, ‘तपाईं मान्छे चिन्नु हुँदैन रहेछ । अब त चिन्नु भयो होला नि को कस्तो भनेर । हामी तपाईंको साथमा छौं । तर तपाईंले पटकपटक हामीलाई छोड्नुभयो । तर हामी छोड्दैनौं ।’