वडा अध्यक्ष कप भेट्रान फुटबलको खेल तालिका सार्वजनिक

भरतपुर । भरतपुर महानगरपालिका ६ गीतानगरमा हुने वैदिक आयुर्वेद वडा अध्यक्ष कप भेट्रान फुटबल प्रतियोगिताको खेल तालिका सार्वजनिक भएको छ । गीतानगर व्बाइज क्लबको आयोजनामा भोलि (शनिबार) देखि सुरु हुने प्रतियोगिता खेल तालिका आज सार्वजनिक भएको हो । प्रतियोगितामा १६ टोली सहभागी छन् । सहभागी टोलीलाई दुई समूहमा विभाजन गरिएको छ । प्रतियोगिताको खेलहरु भरतपुर ६ स्थित सिद्धेश्वर मैदानमा हुनेछ ।

प्रतियोगिताको पहिलो खेलमा शनिबार वडा नम्बर ५ र २८ भिड्नेछन् । पहिलो खेल बिहान ७ बजे हुनेछ । बिहान ८ बजे दोस्रो खेल हुनेछ । जसमा वडा नम्बर २२ र ६ ए भिड्नेछन् । उद्घाटन कार्यक्रम भने दिउँसो ४ बजे हुने आयोजकले जनाएको छ । उद्घाटनपछि शनिबार नै तेस्रो खेलमा वडा नम्बर ६ बी र २० भिड्नेछन् ।

बैशाख २७ गतेसम्म चल्ने प्रतियोगिताको विजेताले ट्रफीसहित ५० हजार रुपैयाँ प्राप्त गर्नेछ । उपविजेताले ट्रफीसहित २५ हजार प्राप्त गर्नेछ । यस्तै विभिन्न विधाका उत्कृष्ट खेलाडीहरुले पनि पुरस्कार प्राप्त गर्नेछन् ।

प्रतियोगितालाई वैदिक आयुर्वेद सेवा प्रालिले मुख्य प्रायोजन गरेको छ । यस्तै सेन्ट्रल कलेज अफ भोकेसनल ट्रेनिङ प्रालि सह(प्रायोजक तथा भरतपुर ६ को वडा कार्यालय संरक्षक संस्थाको रुपमा रहेको छ ।