यूएई एसीसी महिला प्रिमियर कप क्रिकेटको सेमिफाइनलमा

काठमाडौँ । मलेसियामा जारी एसीसी महिला प्रिमियर कप क्रिकेट प्रतियोगिताको बुधबार सम्पन्न पहिलो क्वार्टरफाइनल खेलमा संयुक्त अरब इमिरेट्स विजयी भएको छ । प्रतियोगिताको सेमिफाइनलमा पुग्ने पहिलो टोली बन्नेक्रममा यूएईले इन्डोनेसियालाई ५६ रनले हरायो ।

टस जिती पहिले ब्याटिङको रोजेको यूएईले निर्धारित २० ओभरमा ६ विकेट गुमाएर एक सय २२ रन बनाएको थियो । जवाफी ब्याटिङमा ओर्लिएको इन्डोनेसियाले भने निर्धारित ओभरमा ६ विकेट गुमाएर ६६ रनमात्र बनाउन सक्यो ।

पहिले ब्याटिङ गरेको यूएईका लागि समाइरा धरनिधरकाले सर्वाधिक ३१ रनको योगदान गरिन् । उनले २८ बलमा पाँच चौका पनि हिर्काइन् । ओपनर काभिसा एगोडागेले २६ रन बनाइन् । खुशी शर्माले पनि टोलीको खातामा २४ रन थपिन् ।

इन्डोनेसियाकी बलर नि वान सारियानीले दुई विकेट लिइन् । जवाफी ब्याटिङ गरेको इन्डोनेसियाका माथिल्ला चार ब्याटर सस्तैमा पेभेलियन फर्किएका थिए । माथिल्ला तीन ब्याटर त शून्य रनमै आउट भएका थिए ।

इन्डोनेसियाका लागि रहमावती पांगेस्तुतीले सर्वाधिक अविजित १५ रन बनाइन् । नि कादेक रानीले १३ र नि मादे पुत्रीले १२ रन बनाएका थिए । इन्डोनेसियाले अतिरिक्त रुपमा १७ रन पाएको थियो । यूएईकी बलर हिना होचाँदनीले तीन विकेट लिइन् । उनी प्लेयर अफ दी म्याच घोषित भइन् ।