राष्ट्रिय महिला भलिबल : न्यु डायमण्ड च्याम्पियन

काठमाडौं । विभागीय टोली एपिएफ क्लबमाथि ३–२ को रोमाञ्चक जित निकाल्दै न्यु डायमण्ड छैटौं संस्करणको केएनपी राष्ट्रिय महिला राष्ट्रिय भलिबल प्रतियोगिताको च्याम्पियन भएको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा सम्पन्न फाइनल खेलमा न्यु डायमण्डले लगातार पाँच संस्करणको च्याम्पियन एपिएफलाई पराजित गर्दै पहिलो पल्ट च्याम्पियन भएको हो । 

प्रतियोगिताको फाइनलमा पहिलो पटक पुगेसँगै न्यु डायमण्ड च्याम्पियन भएको हो । यसअघि पहिलोदेखि चौथोसम्म एपिएफ र नेपाल पुलिसबीच फाइनल खेल भएको थियो भने पाँचौ संस्करणमा एपिएफ र त्रिभुवन आर्मीबीच फाइनल खेल भएको थियो ।

प्रतिष्पर्धात्मक भएको खेलमा एपिएफविरुद्ध पहिलो सेट २८–२६ ले आफ्नो पक्षमा पारेको थियो । दोस्रो सेट भने डायमण्डले २१–२५ ले गुमाउन पुग्यो । तेस्रो सेटमा पुन सम्हालिएको प्रदर्शन गरेको न्यु डायमण्डले उत्कृष्ट पुनरागमन गर्दै २–१ को सेटमा अग्रता लिन सफल भएको थियो । तेस्रो सेटमा एक समय १६–६ को अवस्था हुँदा न्यु डायमण्डले लगातार १० अंक गुमाउन पुगेको थियो । तर अन्तिममा २५–२२ ले विजयी हुन सफल भएको थियो । चौथो सेटमा भने न्यु डायमण्डले सम्हालिएको प्रदर्शन गर्न सकेन । 

शुरुवातदेखि नै पछि परेको डायमण्डले २४–२६ ले गुमाउन पुग्यो थियो । सोही सेटमा २०–२१ को अवस्थामा एपिएफकी स्पाइकर निरुता ठगुन्ना चोटग्रस्त हुँदै कोर्ट छोड्नुपरेको थियो । 

त्यसपछि निर्णायक तथा पाँचौं सेटमा पुगेको खेलमा ३–३ को बराबरीपछि अग्रता लिँदै डायमण्डले १५–९ को सहज जित निकाल्दै च्याम्पियन बन्न सफल भएको हो । फाइनल खेलमा प्रगति नाथले प्लेयर अफ दि म्याच घोषित हुँदै नगद १० हजार रुपैयाँ र ट्रफी हात पारिन् ।

चार टोलीबीच भएको प्रतिष्पर्धाबाट च्याम्पियन बनेसँगै डायमण्डले ३ लाख रुपैयाँ र ट्रफी प्राप्त ग¥यो । उपविजेता एपिएफले १ लाख ५० हजार रुपैयाँ हात पार्दा तेस्रो स्थानका लागि मंगलवार नै भएको  प्रतिष्पर्धामा आर्मीलाई पराजित गरेको पुलिसले ७५ हजार रुपैयाँ हात पा¥यो । 

शेरबहादुर प्रतिष्ठानको आयोजनामा भएको प्रतियोगितामा च्याम्पियन न्यु डायमण्डकी स्पाईकर प्रतिभा माली सर्वोत्कृष्ट खेलाडी घोषित भइन् । उनले नगद ५० हजार रुपैयाँसहित आकर्षक पुरस्कार प्राप्त गरिन् । 

यस्तै डायमण्डकी स्पाइकर सलिना बुढा मगर इमर्जिङ खेलाडी घोषित हुँदै १५ हजार रुपैयाँ प्राप्त गर्दा डायमण्डकै प्रगति नाथ उत्कृष्ट सेटर, सलिना श्रेष्ठ उत्कृष्ट लिवेरो र कुमार राई उत्कृष्ट प्रशिक्षक बने । एपिएफकी निरुता ठगुन्ना उत्कृष्ट स्पाइकर चुँनिदा एपिएफकी सरस्वती चौधरी सर्भर र हीरा केसी उत्कृष्ट ब्लकर चुनिइन् । उनीहरुले समान १५-१५ हजार रुपैया र ट्रफी प्राप्त गरे ।