रोनाल्डोको ७००औं गोलमा पोर्चुगलको हार

एजेन्सी । सुपरस्टार क्रिस्टियानो रोनाल्डोले करियरको सात सय गोल पूरा गरेको खेलमा पोर्चुगल पराजित भएको छ । सन् २०२० को युरोकप छनोट अन्तर्गत सोमबार राति भएको समूह ‘बी’ को खेलमा पोर्चुगल युक्रेनसँग उसैको मैदानमा २–१ गोलले पराजित भयो । यस खेलमा रोनाल्डोले गोलगर्दै समग्रमा सात सय गोल पूरा गरेका छन् । रोनाल्डोको राष्ट्रिय टोलीका लागि भने यो ९५औं गोल हो । उनले पोर्चुगलबाट हालसम्म एक सय ६२ खेल खेलेका छन् ।

निकै प्रतिस्पर्धात्मक खेलमा युक्रेनको जितमा रोमन यारेमचुकले छैटौं र एन्ड्री यामोलेन्कोले २७औं मिनेटमा गोल गरे । युक्रेन ७२औं मिनेटमा १० खेलाडीमा समेटिएको थियो । विपक्षीलाई फलहानेपछि युक्रेनका ताराज स्टेपानेस्को दोहोरो पहेँलो (रातो) कार्ड पाउँदै बाहिरिएका थिए । ताराजको त्यही गल्तीमा पोर्चुगलले पेनाल्टीमार्फत गोल फर्कायो ।

पोर्चुगलका लागि रोनाल्डोले पेनाल्टीको सदुपयोग गरेका थिए । दोस्रो हाफमा लगातार मौका बनाएपनि थप गोलगर्न नसक्दा पोर्चुगल हार खेप्न बाध्य बन्यो । जितसँगै युक्रेन युरोकपमा छनोट भएको छ । समूह ‘बी’ मा शीर्ष स्थानमा रहेको युक्रेनले सात खेलबाट १९ अंक बनाएको छ । दोस्रो स्थानमा रहेको पोर्चुगलको ६ खेलबाट ११ अंक पुगेको छ । पोर्चुगलको पनि छनोटको सम्भावना जिवित छ । छनोट चरण पार गर्न पोर्चुगललाई अर्को खेल जित्नुपर्नेछ ।

यही समूहको अर्काे खेलमा सर्वियाले लिथुनियालाई २–१ गोलले पराजित गरेको छ । जितसँगै सात खेलबाट १० अंक बनाएको सर्विया तेस्रो स्थानमा छ । सर्वियाले पनि युरोकपमा छनोट हुने सम्भावना जीवित राखेको छ । चार अंक बनाएको लक्जम्बर्ग चौथो तथा एक अंकमा सिमति लिथुनिया समूहको अन्तिममा छ ।