जङ्गली च्याउ खाँदा दुई जनाको मृत्यु, आठ जना बिरामी

पाल्पा । पाल्पा जिल्लाको निस्दी गाउँपालिका–३, झिरुवासको सार्कीडाँडामा दुई बालिकाको मृत्यु भएको छ ।  जङ्गली च्याउ खाँदा उनिहरुको मृत्यु भएको हो । मृत्यु हुनेमा नौँ वर्षीया निर्मलासिंह ठकुरी र चार वर्षीया विष्णुसिंह ठकुरी रहेका छन् । उनीहरु दिदीबहिनी हुन् ।

जङ्गली च्याउ तरकारीका रुपमा खाँदा दुईको मृत्यु र आठ जना बिरामी परेका पाल्पाका जिल्ला प्रहरी प्रमुख प्रहरी वरिष्ठ उपरीक्षक विश्वमणि पोखरेलले जानकारी दिए ।  चितवनस्थित पुरानो मेडिकल कलेजमा उपचारका क्रममा बिरामीको मृत्यु भएको  प्रहरी वरिष्ठ उपरीक्षक पोखरेलले बताएकाछन्  । 
बिरामी हुनेमा ४५ वर्षीय पुरन खाम्चा, उनकी श्रीमती ४० वर्षीया चन्द्री खाम्चा, १५ वर्षीया छोरी निर्मला खाम्चा, ८१ वर्षीय प्रेमबहादुरसिंह ठकुरी, ३० वर्षीया दानकुमारी सिंह, सात वर्षीय सुमन सिंह, धनकुमारी सिंह र निरुता सिंह ठकुरी रहेका छन् । उनीहरु चार परिबारका सदस्य हुन् । बिरामीको नवलपुरस्थित मध्यविन्दु अस्पतालमा उपचार भइरहेको छ । शुक्रबार बेलुकी च्याउ खाएपछि शनिबार अपराह्नबाट बिरामी पर्न थालेका हुन् ।

वान्ता हुने, बेहोस हुने, अत्तालिने गरेपछि उनीहरुलाई उपचारका लागि अस्पताल लगिएको थियो । बिरामीको अवस्था गम्भीर रहेको प्रहरीको भनाइ छ ।