बलिउड फिल्मबाट अनमोलले ८० लाख पारिश्रमिक पाउने

काठमाडौँ । मेघा स्टार अनमोल केसीले बलिउड फिल्मका लागि ८० लाख रुपैयाँ पारिश्रमिक पाउने भएका छन् । बलिउड अभिनेत्री श्रीदेविकी छोरी जान्भी कपूरसँगै फिल्म खेल्न लागेका अनमोलले ७० देखि ८० लाखसम्म पारिश्रमिक दिन निर्माण टिम तयार छ । अनमोलले फिल्मको कन्सेप्ट एकसरो सुनिसकेका छन् । तर, उनले निर्देशक र निर्मातासँग फाइनल स्क्रिप्ट मागेका छन् । यस फिल्मलाई ‘द म्यान फ्रम काठमाडौं’ का निर्देशक पेमा धोन्डुपले निर्माण गर्न लागेका हुन् । 
 अहिले यस फिल्मको गीत तयार गर्ने काम भइरहेको छ । अनमोलले मंगलबार दिउँसो पुतलीसडकमा पत्रकारसँग गफिँदै बलिउड फिल्मबाट अफर आएको भएता पनि गर्ने फाइनल नभएको प्रष्टयाए । 
उनी अभिनित चलचित्र ’क्याप्टेन’ फागुन १७ मा प्रदर्शनमा आइसकेको छ भने ’ए मेरो हजुर ३’ यही चैत २९ मा प्रदर्शनमा आउँदैछ । ’क्याप्टेन’ को तनावबाट बल्ल मुक्त भएका उनी अब ’ए मेरो हजुर ३’ को प्रचारमा खटिन सुरु गरेका छन् । 
यस फिल्ममा उनले पहिलो पटक ’फिल्मी ब्लड’ सँग काम गरेका छन् । उनको अपोजिटमा अभिनेत्री तथा निर्देशक झरना थापाकी छोरी सुहाना थापा छिन् । यो उनको डेब्यू फिल्म हो । फिल्मले एक सेलिब्रेटी र फ्यानको प्रेमकथा भन्छ । गीतसंगीत र ट्रेलरले निकै राम्रो प्रतिक्रिया बटुलिरहेको अवस्थामा फिल्मले पनि बक्सअफिसमा राम्रो पैसा छाप्ने फिल्म पण्डितहरुको पूर्वअनुमान छ ।