भरतपुर : इन्डियन प्रिमियर लिग आईपीएलको दिल्ली डेयर डेभिल्स खेल्न छानिएका सन्दिप लामिछानेले प्रतियोगितामा १ नम्बरको जर्सी लगाउने छन् । होटल अन्नपुर्णमा एक कार्यक्रमका बिच उनको जर्सी सार्वजनिक गरिएको थियो ।
सन्दिपलाई दिल्लीले आईपीएल अक्सनमा २० लाख भारुमा खरिद गरेको थियो । ७ अप्रिलबाट सुरु हुने आईपीएलको लागि नेपाली लेग स्पिनर २७ तारिकमा दिल्ली पुग्ने छन्।
जर्सी पाएपछि सन्दिपले भने नेपालको लागि पहिलोपटक खेल्दा जर्सी लगाएजस्तै महसुस भएको बताए। गौतम गम्भीरको टिमबाट आईपीएल खेल्न उत्साहित रहेको र प्लेयिंग ११ मा स्थान बनाउनेमा बिश्वास समेत उनले ब्यक्त गरे।
कार्यक्रममा बोल्दै दिल्ली सीईओ दुवाले सन्दिपलाई १ बर्ष देखिनै पछ्याउदै आएको खुलासा गरे। सन्दिपको प्रतिभा हेरेरनै उनलाई छनौट गरेको र अक्सनमा छनौट गर्नुअघिनै दिल्लीमा सन्दिपको ट्रायल समेत लिएको उनले बताए। यस्तै राखेप सदस्यसचिब केशब बिस्टले सन्दिपलाई बधाई र सुभकामना दिंदै नेपाली खेलाडी अन्तर्रा्ष्ट्रियस्तरमा खेल्नुमा गर्व गर्नु पर्ने बताए।
सन्दिप लामिछाने नेपाली टिमको लागि खेल्दा र अन्य प्रतियोगतामा समेत २५ नम्बरको जर्सी लगाएर खेल्ने गर्छन् यसको पछाडी भावनात्मक कारण रहेको छ । सन्दिपको दिदिको छोरिको आकस्मिक निधन २५ गते भएपछि उनको सम्झनामा २५ नम्बरको जर्सी उनले लगाउने गर्थे। तर यसपटक सन्दिप २५ हैन दिल्लीको लागि १ नम्बरको जर्सीमा उत्रनेछन् जसको पछाडी पनि अर्को कारण रहेको छ ।
२५ नम्बरको जर्सी दक्षिण अफ्रिकी खेलाडी कागीसो रबाडाले पनि लगाउने भएपछि सन्दिपको सोहि जर्सी नम्बरको जर्सी लगाउने चाहना पुरा हुन नपाएको हो। किन १ नम्बर जर्सी रोजेको भन्ने उत्तर दिंदै सन्दिपले २५ नम्बर जर्सीनै माग गरे पनि रबाडाको जर्सी नम्बर पनि उही भएपछि भान्जीको जन्मदिन बैशाखमा भएको कारण १ नम्बर जर्सी रोजेको उनले खुलाए।
प्रतिक्रिया दिनुहोस