चितवन । पूर्वप्रधानमन्त्री एवं नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले नेपाल कम्युनिष्ट पार्टीको स्थायी कमिटीको बैठक सकारात्मक रुपमा अघि बढिरहेको बताउनु भएको छ ।
शहीद स्मृति माध्यमिक विद्यालय भरतपुर महानगरपालिका वडा नम्बर ६, पारसनगरको स्वर्ण महोत्सवको अवसरमा प्राविधिक विद्यालय संचालनार्थ आयोजित धनधान्याचल ज्ञान महायज्ञलाई सम्बोधन गर्नु हुँदै नेकपा अध्यक्ष प्रचण्डले बाहिर सञ्चारमाध्यममा तितामीठा कुरा आए पनि बैठक असाध्यै सौहार्द्रपूर्ण ढङ्गबाट अघि बढेको बताउनु भयो ।
‘बैठकमा सरकारको काम कारबाहीका बिषयमा गम्भीर छलफल भइरहेको छ’ उहाँले भन्नुभयो, ‘बैठकबाट छिट्टै उचित निष्कर्ष निकालेर देशमा नयाँ अभियानका साथ आउँदैछौं । यो बैठकले पार्टीको आगामी कार्यदिशा तय गर्नेछ ।’
पूर्वप्रधानमन्त्री प्रचण्डले सामुदायिक विद्यालयको गुणस्तर वृद्धि गर्न प्राविधिक र व्यावसायिक शिक्षामा जोड दिने नीति सरकारले लिइएको उहाँले बताउनु भयो ।
सामुदायिक विद्यालयको शिक्षा बेरोजगारीभन्दा रोजगारी सिर्जना गर्ने भएमात्र देश समृद्धितर्फ जाने उहाँले बताउनु भयो । समयसापेक्ष व्यावसायिक र प्राविधिक शिक्षाको विकास गरेर बेरोजगारीको अन्त्य गर्न सकिने उहाँको भनाइ थियो । ‘अबका युवाहरु पढेर विदेश जाने होइन, स्वदेशमै रोजगारीमा लाग्न आवश्यक छ’ प्रचण्डले भन्नुभयो, ‘देशबाट ब्रेन ड्रेन (बौद्धिक पलायन) हुँदा समृद्धिमा समेत असर पर्छ ।’
पूर्वप्रधानमन्त्री प्रचण्डले चितवनमा भैतिक पूर्वाधारको विकासका लागि हुलाकी मार्ग, राप्ती र नारायणीमा तटबन्धन सहितको रिङरोडका लागि विस्तृत परियोजना प्रतिवेदन (डीपीआर) तयार भएर बजेट निकासाको तयारीमा रहेको बताउनु भयो । अध्यक्ष प्रचण्डले अबको ४ बर्षभित्र चितवनका कुनै पनि बाटो धुलोमैलो नहुने दाबी गर्नुभयो । चितवन जिल्लाको अनुहार फेरिने बताउँदै उहाँले देशलाई समृद्ध बनाउन अभियानात्मक रुपमा अघि बढ्नुपर्ने धारणा राख्नुभयो । देशभरिले भरतपुर महानगरतिर आँखा लगाएर हेरेको भन्दै उहाँले जनताका पक्षमा निस्वार्थरुपमा काम भएको महानगरका रुपमा सिङ्गो देशले प्रेरणा लिएको बताउनुभयो । उहाँले भन्नुभयो, “प्रमुखको नेतृत्वमा जसरी अहोरात्र खटेर नमूना बनाउने काम भएको छ । देशभरिले महानगरतिर आँखा लगाएर हेरेका छन् ।”
कार्यक्रममा प्रमुख वाचक बालकृष्ण अर्याल, भरतपुर महानगरपालिका वडा नं ६ का वडा अध्यक्ष हरिविलास कोइराला, महायज्ञ मूल समारोह समितिका संयोजक एवं विद्यालयका अध्यक्ष विष्णुप्रसाद तिवारी, प्रधानाध्यापक दीपेश पौडेल, प्रवक्ता भागिरथ तिमिल्सिनालगायतले बोल्नुभएको थियो । महायज्ञ पुस १३ गतेसम्म चल्नेछ ।
प्रतिक्रिया दिनुहोस