कोरोनाको संक्रमणको डरले अस्पताल जान डराउछन बिरामी

चितवन । चितवनमा पछिल्लो समय अस्पताल जानेको संख्या निकै कम छ । सर्बसाधारणमा डाक्टरले बिरामी छुदैंनन्, अस्पतालले भर्ना लिदैनन् र गेटबाटै फकाउँछन् भन्ने हल्लाका कारण बिरामी अस्पताल नजाने गरेको पाइएको छ । सामान्य ज्वरो, रुघाखोकी लागेमा सिधै कोरोना अस्पताल लगेर आईसोलेसनमा १४ दिन राख्ने गरेको भ्रमले समेत बिरामी अस्पताल नजाने गरेको पाइन्छ ।

जिल्लाका ठुला अस्पतालहरु प्राय खालि छन् । कोरोनाको हल्ला नहँुदासम्म जिल्लाका अस्पतालमा विरामीको चाप हुनेगरेको थियो । लकडाउन सुरु भएपछि नयाँ विरामी अस्पताल जाने क्रम घटेको र अस्पतालमा भएका विरामी पनि डिस्चार्ज मागेर सवै घर घरमा रहेको अवस्था छ । केही अति संवेदनशिल विरामी वाहेक अहिले कुनैपनि अस्पतालमा नयाँ विरामी देखिदैनन ।

जिल्लामा केन्द्रिय स्तरको भरतपुर अस्पताल, २ नीजि मेडिकल कलेज, २० नीजि अस्पताल, ३ सरकारी अस्पताल, ३ प्राथमिक स्वास्थ्य केन्द्र, ३६ स्वास्थ्य चौकी, २५ वटा ग्रामिण शहरी स्वास्थ्य केन्द्र र ५ वटा सामुदायीक ईकाई रहेका छन् । श्रोतसाधनको अभावले यो समयमा जोखिम मोलेर उपचारको काम गर्न नसकिने बताउदै केही निजी मेडिकलले अहिले काम गरिरहेका छैनन् ।

जिल्लाका अस्पतालमा एकैपटक एक्कासी विरामी कम हुनुलाई चिकित्सकहरुले थप जोखिमको अवस्था मानेका छन् । कोरोना संक्रमणको डरले बिरामी भएकाहरु सकेसम्म अस्पताल जान चाहदैनन् । तर डरकै कारणले रोग पालेर बसिरहँदा दिर्घकालिन समस्या पर्न सक्ने भन्दै समयमा सजग हुन चिकित्सकको सुझाब छ ।

भरतपुर अस्पतालका अध्यक्ष डा. भोजराज अधिकारीले रोग लुकाएर घरमै वस्नु थप जोखिम हुने बताउदै कोरोनाको डर हृदयघात भन्दा चर्को जस्तो देखिएको बताए । घरमै बसेर परामर्शमा औषधि खाएर हुने बाहेक जटिल हुन सक्ने खालका बिरामीहरुलाई अस्पताल आउन आग्रह गर्दै उनले उच्च जोखिमका रोग पालेर नबस्न र अस्पताल आउनै पर्ने बिरामीले डर नमानी आउनुपर्ने बताएका छन् ।

भरतपुर अस्पतालमा गत बर्ष यो समयमा प्रतिदिन एक हजार भन्दा बढी विरामी आएको तथ्याँक भएपनि अहिले प्रतिदिन एक सयको हाराहारीमा मात्र विरामी आउने गरेको भरतपुर अस्पतालका सुचना अधिकारी लिलाधर पौडेलले बताए ।  अन्य अस्पतालमा पनि विरामी कम आउने गरेकाछन् । चितवन मेडीकल कलेजका नर्देशक डा। दयाराम लम्साल आँफुहरुले बिरामी हेरीरहेको भए पनि बिरामीनै आउन छाडेको बताउदै प्रतिदिन सय जना नयां विरामी पनि मुस्किलले आउने गरेको जानकारी दिए ।

स्वास्थ्य कार्यालय चितवनका प्रमुख दिपक तिवारीले बाहीर हिडडुल गर्न जोखिम भएको,घरबाटै चिकित्सक, स्वास्थ्यकर्मीसंग परामर्श गर्ने क्रम बढेकोले विरामी सिधै अस्पतला आउन कम भएको हुनसक्ने बताए । गएको ९ दिनमा जिल्लाका सबै अस्पताल र स्वास्थ्य केन्द्रहरुमा ४ हजार भन्दा बढी बिभिन्न रोगका बिरामीहरु उपचारका लागि आएको जानकारी दिदै तिवारीले लगभग एक हजार विरामी ज्वाृरो र रुघाघोकिका रहेको जानकारी दिएकाछन् ।

नेपाल चिकित्सक संघ चितवनका अध्यक्ष एवं बरिष्ठ फिजिसियन डा। प्रकाश खतिवडाले बल्झने र फैलने खालका समस्या छन भने रोग लुकाउनु घातक हुने बताउदै टेलिफोनमा बुझेर अस्पताल आउनै पर्नेलाई ढुक्क संग आउन आग्रह गरेकाछन् ।

दम बढ्यो, अन्य कारणहरुले उच्च ज्वरो आउँदा अस्पताल आउनै पर्ने बताउदै उनले ज्वरो कोरोनाका कारण मात्र नभए डेंगु, मलेरीया, स्क्रबटाईफस, हेपाटाईटिस जस्ता कारणले पनि हुने भएकाले नडराई अस्पताल आउन सुझाव दिए । घरमानै रोग पालेर बस्ने र अन्तिम अबस्थामा अस्पताल आउँदा उपचार हुन नसकेर ज्यान जान थालेको भन्दै खतिवडाले सबै समयमानै सजग हुनुपर्ने बताए । राजधानी दैनिकमा खबर छ ।