लागु औषधसहित विभिन्न स्थानबाट पाँच जना पक्राउ

काठमाडौँ ।  अवैध लागुऔषध सहित विभिन्न स्थानबाट पाँच जना पक्राउ परेका छन् । प्रहरीका अनुसार पर्सा, झापा र कैलाली जिल्लाबाट लागु औषधसहित ५ जना पक्राउ परेका हुन् ।

पर्साको विन्दवासिनी गाउँपालिका–२ स्थित सडकबाट अवैध लागु औषध चरेस करिब ५ किलोग्रामसहित २ जनालाई शुक्रवार दिउँसो प्रहरीले पक्राउ गरेको छ । पक्राउ पर्नेहरूमा पटेर्वासुगैली गाउँपालिका-५ निचुटा बस्ने ४५ वर्षीय जनार्दन औझईया र भारत बिहार बस्ने ६० वर्षीय गौरीशङ्कर भगत माली रहेका छन् ।

अस्थायी प्रहरी पोस्ट बहुअर्वाभाठाबाट खटिएको प्रहरीले महुवनबाट वीरगन्जतर्फ साइकलमा जाँदै गरेका उनीहरूलाई उक्त चरेस सहित पक्राउ गरेको हो । त्यस्तै झापाको मेचीनगर नगरपालिका–६ काँकडभिट्टा पुरानो मेचीपुल सडकबाट लागु औषध खैरो हेरोइन करिब ३ ग्रामसहित उदयपुर चौदण्डीगढी नगरपालिका–१ घर भई सुनसरी इटहरी उपमहानगरपालिका–१९ बस्ने २८ वर्षीय जीवन कामीलाई प्रहरीले पक्राउ गरेको छ ।

इलाका प्रहरी कार्यालय काँकडभिट्टा र लागुऔषध नियन्त्रण ब्युरो काँकडभिट्टाबाट खटिएको संयुक्त टोलीले शुक्रवार साँझ भारतबाट नेपालतर्फ आउँदै गरेको को.१२ प ४५७३ नम्बरको मोटरसाइकलमा सवार उनलाई उक्त पदार्थसहित पक्राउ गरेको हो ।

उता कैलालीको टिकापुर नगरपालिका– ९ खक्रौलाबाट खैरो हेरोइन ४ ग्राम ६ सय १० मिलिग्रामसहित टिकापुर नगरपालिका–१ बस्ने २१ वर्षीय विशाल शाहीलाई शुक्रवार दिउँसो प्रहरीले पक्राउ गरेको छ । इलाका प्रहरी कार्यालय टिकापुर र प्रहरी चौकी कालाकुण्डाबाट खटिएको संयुक्त टोलीले भारतबाट नेपालतर्फ पैदल आउँदै गरेका उनलाई उक्त पदार्थसहित पक्राउ गरेको हो ।

कैलालीकै गोदावरी नगरपालिका–५ गेटाबाट खैरो हेरोइन १ ग्राम ३ सय १० मिलिग्रामसहित धनगढी उपमहानगरपालिका–१३ बस्ने २३ वर्षीय प्रवीण रानालाई शुक्रवार दिउँसो प्रहरीले पक्राउ गरेको छ । इलाका प्रहरी कार्यालय मालाखेती र लागु औषध नियन्त्रण ब्युरो शाखा कार्यालय धनगढीबाट खटिएको संयुक्त टोलीले उनलाई उक्त पदार्थ सहित पक्राउ गरेको हो । सबै घटनाका सम्बन्धमा प्रहरीले आवश्यक अनुसन्धान भइरहेको जानकारी दिएको छ ।